Türkmenistanda tehniki ýoduň önümçiligi we eksporty artdyrylýar

Türkmenistanda her ýyl tehniki ýoduň 500 tonnadan gowragy öndürilýär, munuň özi içerki bazaryň hajatlaryny üpjün edýär, ýoduň agramly bölegi bolsa eksport edilýär. Balkan welaýatynyň Esenguly etrabynda ýerleşen «Çukurguýy» meýdançasynda ýylda 90 tonna tehniki ýod öndürýän täze dört sany tejribe-senagat desgalary ulanylmaga berildi. Bu barada ýakynda geçirilen hökümet mejlisinde Ministrler Kabinetiniň Başlygynyň orunbasary B.Öwezow «Türkmenhimiýa» döwlet konserni tarapyndan ýurdumyzda ýoduň hem-de duzuň öndürilişiniň möçberini artdyrmak boýunça alnyp barylýan işler barada hasabatynyň çäklerinde belledi.
Wise-premýeriň habar berşi ýaly, bu taslamalaryň durmuşa geçirilmegi bilen tehniki ýoduň 300 tonnadan gowragyny goşmaça öndürmäge mümkinçilik dörär, bu bolsa «Türkmenhimiýa» döwlet konserniniň eksport mümkinçiliklerini artdyrar.
Hasabatyň çäklerinde Türkmenbaşy etrabyndaky «Guwlyduz» kombinatynyň düzüminde kuwwaty ýylda 40 000 tonna ýodlaşdyrylan nahar duzuny we 2500 tonna gerdejik görnüşli tehniki duzy öndürýän täze önümhananyň gurluşyk-gurnama işleriniň tamamlaýjy tapgyrda alnyp barylýandygy barada habar berildi.
Döwlet Baştutany halk hojalyk toplumynyň hem-de ilatyň öz ýurdumyzda öndürilýän dürli görnüşli, ýokary hilli himiýa önümlerine bolan isleglerini öz wagtynda we bökdençsiz üpjün etmegiň zerurdygyny belläp, öndürilýän nahar we tehniki duzuň hem-de ýoduň ekologiýa talaplaryna we halkara ölçeglere kybap gelmeginiň möhümdigini aýtdy hem-de bu babatda tabşyryklary berdi.