Türkmenistanda döwlet emläginiň kärendesine berilmeginiň tertibi tassyklanyldy

Ministrler Kabinetiniň sanly wideoaragatnaşyk arkaly ýakynda geçirilen mejlisinde «Kärende hakyndaky» Türkmenistanyň Kanunyna laýyklykda döwlet emlägini kärendesine bermegiň tertibini kämilleşdirmek maksady bilen, Türkmenistanyň Prezidenti döwlet emläginiň kärendesine berilmeginiň Tertibini tassyklady.
Gol çekilen resminama laýyklykda, Maliýe we ykdysadyýet ministrligine döwlet emläginiň kärende şertnamalaryny bellenen tertipde bellige almak hem-de Adalat ministrligi bilen bilelikde Karardan gelip çykýan üýtgetmeleri we goşmaçalary Türkmenistanyň kanunçylygyna girizmek baradaky teklipleri bir aý möhletde taýýarlamak hem-de Ministrler Kabinetine bermek tabşyryldy.
Mejlisde bellenilişi ýaly, bu ulgamda gatnaşyklaryň ykdysady, hukuk we guramaçylyk esaslaryny düzgünleşdirmek maksady bilen işlenip taýýarlanylan resminamanyň kabul edilmegi ýurdumyzda kärende hyzmatlar bazaryny has-da giňeltmäge ýardam eder.
Türkmenistanyň Prezidenti bazar gatnaşyklaryna geçilmegi, hususy telekeçiligiň ösmegi bilen baglylykda hereket edýän kadalaşdyryjy namalaryň döwrüň talabyna kybap getirilmeginiň wajypdygyna ünsi çekip, Kararyň düzgünleriniň ýerine ýetirilmegine gözegçiligi üpjün etmek boýunça birnäçe anyk görkezmeleri berdi.