Tokio 2020 Olimpiýa alawyny getirmegiň meýilnamasyny yglan etdi

Tokio 2020 Olimpiýa we Paraolimpiýa oýunlarynyň guramaçylyk komiteti 20-nji martda ýapon paýtagtyna Olimpiýa oduny getirmek däbini mälim etdi. Bu barada ORIENT agentligi habar berýär.
Maglumatlara görä, Olimpiýa alawy 2020-nji ýylyň 12-nji martynda Gresiýanyň taryhy «Gadymy Olimpiýada» ýakylar. Estafetanyň başlangyç tapgyry tamamlanandan soň, 19-njy martda Afinanyň Panafineýk stadionynda fakeli gowşuryş däbi geçiriler.
Günüň dogýan ýurduna olimpiýa oduny 20-nji martda Miýagi prefekturasyna gonýan “TOKYO 2020 Go” atly ýörite uçar getirer. Tokio-2020-niň beýleki wekilleri bilen bir hatarda Olimpiýa nyşanyny üç gezek olimpiýa çempionlary Tadahiro Nomura (dzýudo) we Saori Ýoşida (erkin göreş) ugradar.
“Haçan-da men ýapon wekiliýetiniň kapitany hökmünde Olimpiýa baýdagyny Rio-de-Žaneýrodan getirenimde, Tokio-nyň gezeginiň gelýändigini bilmek bilen, mende buýsanç duýgusy döredipdi. Soňra men göreşden gitdim. Häzir bolsa olimpiýa oduny Gresiýadan alyp gaýtmak işini ýerine ýetirmek meniň üçin uly hormat” – Saori Ýoşida gürrüň berýär.
“TOKYO 2020 Go” uçary gelip gonandan soň, Miýagi, Iwate we Fukusima prefekturalarynda baýramçylyk çäreleri guralar. 26-njy martda Olimpiýa ody Ýaponiýanyň 47 prefekturasy boýunça ýurduň gözel ýerlerine özüniň 121 günlük syýahatyny başlar.