Russiýanyň awiakompaniýasy Moskwadan Türkmenabada howa gatnawyny ýola goýmagy meýilleşdirýär

Russiýa Federasiýasynyň «Nordwind Airlines» awiakompaniýasy Moskwadan Türkmenabada göni ýolagçy gatnawyny meýilleşdirýär – diýip, Turkmenportal «Türkmen gündogary» gazetine salgylanyp habar berýär.
Bellenilişi ýaly, häzirki wagtda taraplar özara gepleşikleri geçirýärler. Häzir «Nordwind Airlines» awiakompaniýasy Boeing 737-800 uçarlary arkaly Moskwa (Russiýa) – Bohtar (Täjigistan) – Moskwa ugry boýunça uçuşda Türkmenabat şäherinde üstaşyr gonuş nokadynda ýangyç doldurýar.
2008-nji ýylda esaslandyrylan awiakompaniýa öz işine bary-ýogy üç uçar arkaly alty ugra hyzmat etmek bilen başlapdy. Geçen 11 ýyldan soňra bu awiakompaniýanyň uçarlary dünýäniň 26 döwletinde 97 howa menziline uçýar. «Nordwind Airlines» awiakompaniýasynyň döwrebap awiaparkynda Boeing 737, Boeing 777, Airbus A330 we Airbus A321 kysymly howa gämileriniň 30-dan gowragy bar.
Russiýada we beýleki käbir dünýä döwletlerinde birbada birnäçe awiakompaniýa hereket edip, olar tas hususy diýen ýalydyr. Şonuň üçin olara tehniki hyzmat we ýangyç üçin iň ýokary hilli we elýeterli nokat esasy zerurlyk bolup durýar. Türkmenabadyň Halkara howa menzili bolsa şeýle nokatlaryň biridir. Ine, şonuň üçin hem bu menzil «Nordwind Airlinesiň» uçarlarynyň hemişelik düşelgeleriniň birine öwrülipdir.
Menzilde daşary ýurtly uçarmanlara ýokary derejede hyzmat etmek üçin ähli mümkinçilikler bar. Onuň kaşaň myhmanhanasynda bolsa gaýry ýurtly gonaklar ýygy-ýygydan düşleýär. Ýeri gelende aýtsak, bu howa menzilinde ýolagçy we ýük gatnatmak boýunça ýyldan-ýyla, aýdanaýa ösüş gazanylýar. Halkara howa menzilinden berlen maglumatda görkezilişi ýaly, şu ýylyň dokuz aýynda ugradylan ýolagçylaryň sany 212 müň, kabul edilenleri 210 müň adamdan geçipdir. Şeýle hem ugradylan ýükler 463 müň, kabul edilenleri 527 müň tonnadan geçýär. Ýylyň dokuz aýynda menzilden 5 tonna golaý poçta ugradylyp, 8 tonna golaýy kabul edildi. Bu sanlar geljekde has hem artyp biler. Çünki Türkmenabadyň Halkara howa menzili halkara uçuşlaryň meşhur nokadyna öwrülýär.