Ahal welaýatynda BMG-niň kubogyny almak ugrunda talyplaryň arasynda bäsleşik geçirildi

21-nji oktýabrda Ahal welaýatynyň Ak bugdaý etrabynyň 27-nji orta mekdebinde Durnukly ösüş maksatlaryny durmuşa geçirmek meseleleri boýunça BMG-niň kubogyny almak ugrunda talyplaryň arasynda bäsleşik geçirildi.
Türkmenistanyň DIM-niň resmi saýtynyň habar berşi ýaly, BMG-niň güni mynasybetli geçirilen bu çärä Magtymguly adyndaky Türkmen döwlet uniwersitetiniň, Türkmen döwlet ykdysadyýet we dolandyryş institutynyň, Türkmenistanyň DIM-niň Halkara gatnaşyklary institutynyň, Halkara ynsanperwer ylymlary we ösüş uniwersitetiniň talyplary, BMG-niň Türkmenistandaky wekilhanalarynyň ýolbaşçylary, diplomatik korpusyň we köpçülikleýin habar beriş serişdeleriň wekilleri gatnaşdylar.
Bäsleşik “Içerki baýlyklar Durnukly ösüş maksatlaryny maliýeleşdirmegiň çeşmesidir” atly tema boýunça iňlis dilinde geçirildi we oňa 4 sany ýokary okuw mekdeplerinden 4 topar gatnaşdy.
Bäsleşik BMG-niň Türkmenistandaky hemişelik utgaşdyryjysy hanym Ý.Panowanyň çykyşy bilen başlandy. Ol öz çykyşynyň dowamynda bu çäräniň eýýäm 7 ýyl bäri geçirilýändigini aýtdy hem-de Türkmenistanyň ýaş nesilleriniň Durnukly ösüş maksatlaryny amala aşyrmakda goşant goşýandyklaryny belledi.
Çykyşlara emin agzalary: Türkmenistanyň Maliýe we ykdysadyýet ministrliginiň wekili, BMG-niň Türkmenistandaky hemişelik utgaşdyryjysy Ý.Panowa, BMG-niň Çagalar gaznasynyň Türkmenistandaky wekilhanasynyň ýolbaşçysy K.Weýgand, Ýewropa bileleşiginiň Türkmenistandaky wekilhanasynyň işlerini wagtlaýyn ynanylan wekili L.Frebort baha berdiler.
Bäsleşigiň ahyrynda gatnaşan ähli talyplara hormat hatlary we sowgatlar gowşuryldy. BMG-niň Baş kubogyna Halkara ynsanperwer ylymlary we ösüş uniwersitetiniň topary mynasyp boldy.