Türkmenistana maýa goýum goýmak boýunça Ýaponiýa öňdebaryjy orny eýeleýär

Türkmenistanda iri taslamalary durmuşa geçirmeklige gönükdirilýän daşary ýurt maýa goýumlarynyň düzüminde Ýaponiýa öňdebaryjy orny eýeleýär. Bu barada Türkmenistanyň Daşary ykdysady iş bankynyň müdirýetiniň başlygy Rahymberdi Jepbarow Tokioda geçirilen işewürler maslahatynda belledi, diýip ORIENT agentligi habar berýär.
2019-njy ýylyň 9 aýynyň jemi boýunça daşary ýurtdan gelýän maýa boýunça ýurtlaryň ilkinji bäşligi şundan ybarat: Ýaponiýa, Hytaý, Günorta Koreýa, Germaniýa we ABŞ.
R.Jepbarowyň çykyşynda belleýşi ýaly, ýurduň daşary söwdasynyň möçberi 2019-njy ýylyň birinji ýarymynda 7,2 mlrd amerikan dollaryna, şol sanda eksport – 4,7 mlrd dollar, import – 2,5 mlrd dollar boldy. Ýagny položitel saldo 2,2 mlrd dollara deň boldy.
Ýaponiýanyň kompaniýalary we maliýe guramalary bilen köp ýyllyk hyzmatdaşlyk Türkmenistanyň maýa goýum mümkinçilikleriniň netijeli durmuşa geçirilýändiginiň aýdyň mysalydyr. Türkmenistanyň diňe bir Daşary ykdysady iş bankynyň portfelinde umumy bahasy 7,6 mlrd amerikan dollaryna barabar bolan 10 sany maýa goýum taslamasy bar. Şolarda ýapon maliýeleşdirmesiniň paýy – 4,6 mlrd dollara barabardyr.
Daşary ýurt maýalary boýunça pudaklaýyn gatnaşyk babatda alanyňda, bu ýerde ilkinji orunda gazhimiýa senagaty durýar.
Täze maýa goýum taslamalarynyň hatarynda — Ahal welaýatynda gazbenzin öndürmek boýunça zawodyň ikinji tapgyryny, Balkan welaýatynda ýene-de bir karbamid zawodyny we gazhimiýa toplumyny gurmak, Lebap welaýatynda himiýa senagatynyň önümçilik kuwwatlyklaryny artdyrmak we başga-da senagat, ulag taslamalary bar.