Qantas awstraliýa awiaýükdaşaýjysynyň uçary taryhda ilkinji gezek Nýu-Ýork – Sidneý ugry boýunça gonalgasyz uçuşy amala aşyrdy. Şeýle maglumat kompaniýanyň beýannamasynda habar edildi.
Has takygy, 19 sagat 16 minut dowamlylykda türgenleşik uçuşyndan soň uçar Sidneýa gondy. Uçuşa 49 ýolagçy we ekipažyň agzalary gatnaşdy, diýip TACC habar berýär.
Uçuş prosesinde birnäçe eksperimentler geçirildi, onuň netijeleri bolsa adamlaryň bortda özlerini duýuşlaryny anyklamaga mümkinçilik berýär. Awiaýükdaşaýjynyň pikirine görä, bu barlaglar geljekde ekipažyň agzalygyna kandidatlaryň sanawyny düzmäge, şeýle-de uzak gatnawlarda ýolagçy hyzmatlarynyň normatiwini işläp taýýarlamaga mümkinçilik berer.
Şu ýylyň awgustynda Qantas kompaniýasy Awstraliýanyň gündogar kenarýakasyndan Nýu-Ýorka we Londona uzak gatnawlary amala aşyrmagy meýilleşdirýändigini habar edipdi. Täze ugurlar Awstraliýanyň şäherlerine uçmak üçin täze gatnawlary açmagy göz öňünde tutýan Sunrise-Qantas taslamasynyň bir bölegi bolar.
Habar berlişine görä, ýükdaşaýjy dekabra çenli gatnawlaryň ekonomiki peýdasyny doly ýüze çykarar we Sunrise taslamasynyň uzak aralyga gatnawlarynyň goýberilişi barada anyk çözgüdi kabul eder.
Awstraliýa kompaniýasynyň uçary Nýu-Ýorkdan Sidneýa ilkinji gonalgasyz uçuşy amala aşyrdy
- 21.10.2019 06:27
- 3.2k+
