Türkmenistanda plastik ýygnamak boýunça ekologiýa çäresi badalga aldy

Türkmenistanyň tebigaty goramak jemgyýeti plastik ýygnamak boýunça ekologiýa çäresine badalga berdi. Bu çäräniň maksady — jemgyýetçiligi daşky gurşawyň hapalanmagy meselesine çekmek we bilelikdäki tagallalar bilen plastik galyndylaryň sanyny azaltmakdan ybaratdyr. Bu barada ORIENT agentligi habar berýär.
Bu çärä goşulyp, daşky gurşawy gorap saklamaga şahsy goşandyny islendik adam goşup biler. Munuň üçin suwdan, ösümlik ýagyndan, hojalyk himiýasyndan boşan plastik gaplary Aşgabatdaky Mäti Kösäýew köçesiniň 23/1 jaýynda ýerleşýän kabul ediş nokadyna eltip tabşyrmaly. Eger-de sizde plastik gaplaryň aşa köp mukdary üýşen bolsa, onda olary alyp gaýtmakda gurama size ýardam edip biler.
Bu çärä gatnaşýan meýletinçilere gurama dürli ösümlikleriň tohumlaryny sowgat berýär. 10-15 kilogram plastik üçin, çärä gatnaşyja 3-4 tohum berilýär.
Soňra plastik gaýtadan işlenilýär we güldanlary, haltalaryň önümçiliginde zerur bolan sintetik sapaklary we beýleki köp sanly önümleri öndürmek üçin peýdalanylýar.
Bu günki güne çenli ekologiýa çäresine gatnaşyjylar 2,5 tonnadan gowrak plastik önümleri toplap, utilizirlediler. Guramanyň wekilleriniň bellemegine görä, golaýda bu ekologiýa çäresine Türkmenistanyň beýleki sebitleri hem goşuldy. Ol ýerlerde hem bölümçeler hereket edýär.
Şeýle hem guramanyň wekilleri birnäçe göçme çäreleri hem geçirýärler. Geçen ýyl Tebigaty goramagyň halkara bileleşiginiň agzasy bolup durýan Türkmenistanyň tebigaty goramak jemgyýetiniň wekilleri Hazaryň kenarýakasynda bu zolagy arassalamak boýunça ekologiýa çäresini geçirdiler.
31-nji oktýabrda bellenilip geçiljek Şäherleriň bütindünýä gününde bolsa, gurama BMG-niň Ösüş maksatnamasy bilen bilelikde okuwçylar bilen Aşgabadyň eteklerinde bag ekmek çäresine gatnaşarlar.