Türkmenistanyň wekiliýetiniň 14-15-nji oktýabrda Italiýa amala aşyran iş saparynyň barşynda şu ýylyň noýabrynda Türkmenistanyň Prezidenti Gurbanguly Berdimuhamedowyň Italiýa Respublikasyna meýilleşdirilýän resmi saparyny guramak meseleleri ara alnyp maslahatlaşyldy.
Türkmenistanyň Daşary işler ministrliginiň resmi saýtynyň habar bermegine görä, Türkmenistanyň DIM-niň ýolbaşçysynyň orunbasary B.Mätiýewiň ýolbaşçylygyndaky Türkmenistanyň wekiliýeti Italiýa Respublikasynyň Daşary işler we halkara hyzmatdaşlygy ministriniň orunbasary Manlio Di Stefano bilen geňeşmeler geçirdi.
Duşuşygyň dowamynda taraplar syýasy-diplomatik, söwda-ykdysady we medeni-ynsanperwer pudaklaryndaky ikitaraplaýyn hyzmatdaşlygy giňeltmek meselelerini ara alyp maslahatlaşdylar.
Türkmenistanyň Prezidentiniň resmi saparynyň çäklerinde Milan şäherinde geçirilmegi göz öňünde tutulýan türkmen-italýan işewürler maslahatyna degişli meselelere hem seredilip geçildi. Şeýle-de taraplar gatnaşyklaryň ösüşiniň oňyn dinamikasyny belläp, ikitaraplaýyn gyzyklanma bildirilýän dürli ugurlardaky hyzmatdaşlygy geljekde berkitmek barada pikir alyşdylar.
Noýabrda Türkmenistanyň Prezidentiniň Italiýa resmi sapary meýilleşdirilýär
- 17.10.2019 01:48
- 2.7k+
