2019-njy ýylda Buker baýragyna birbada 2 ýazyjy: Margaret Etwud we Bernardin Ewaristo mynasyp boldy. Bu barada bäsleşigiň resmi saýtynda habar berilýär.
Etwud eýýäm ikinji gezek Buker baýragyna mynasyp bolmagy başardy. 2000-nji ýylda ol «Kör ganhor» romany üçin bu baýragy alypdy. Bu gezek Etwud «Wesýetler» diýen romany üçin Buker baýragyny eýeledi.
Ewaristo «Gyzlar, zenanlar, galan zatlar» diýen romany üçin baýraga mynasyp boldy. Bu romanynda ol 12 sany garaýagyz britaniýaly zenanlaryň durmuşyndan gürrüň berýär.
1993-nji ýyldan bäri Bukeriň düzgünlerine laýyklykda, baýrak birbada birden köp adama berilmeýärdi. Emma emin agzalar topary Etwud bilen Ewaristonyň arasyndan birini saýlap bilmändiklerini, şonuň üçin hem kadadan çykma edendiklerini aýdýarlar.
Esasy baýragy — 50 müň funt sterlingi — awtorlar özara paýlaşarlar. Olaryň ikisi hem baýragyň taryhyna ýazylar: Etwud baýraga mynasyp bolan iň ýaşuly zenan hökmünde, Ewaristo bolsa baýraga mynasyp bolan ilkinji garaýagyz zenan hökmünde.
2019-nj ýylda Buker baýragyna Margaret Etwud we Bernardin Ewaristo mynasyp boldy
- 15.10.2019 17:33
- 2k+
