FIFA we BSGG futbolyň üsti bilen sagdyn durmuş ýörelgelerini wagyz edip başlar

Futbolyň Halkara Federasiýasy we Birleşen Milletler Guramasy adamlaryň arasynda sagdyn durmuş ýörelgeleriniň artykmaçlyklary baradaky bilimleri artdyrmak boýunça tagallalaryny birleşdirýär. BSGG-niň ştab-kwartirasynda Bütindünýä Saglygy Goraýyş Guramasynyň (BSGG) baş direktory Tedros Adhan Gebreýesus bilen FIFA-nyň prezidenti Žanni Infantinonyň Özara düşünişmek hakynda Ähtnama gol çekmegi muňa şaýatlyk edýär. Bu barada Orient habarlar agentligi habar berýär.
Guramalaryň ikisi hem bütin dünýäde futbolyň üsti bilen sagdyn durmuş ýörelgelerini wagyz etmek borçnamalaryny öz üstüne aldylar.
— Ýer ýüzüniň ilatynyň ýarysy 2018-nji ýylyň futbol boýunça dünýä çempionatyna tomaşa etdi. Bu bolsa biziň birleşmegimiz, milliardlarça adama sagdyn durmuş ýörelgesini alyp barmak boýunça peýdaly habary ýaýratmagymyz üçin ägirt uly mümkinçilikleri berjekdigini aňladýar – diýip BSGG-niň baş direktory belleýär.
Dört ýyllyk hyzmatdaşlygyň çäklerinde BSGG FIFA-nyň çärelerinde temmäkiden azat zolagy gurnamak, milli futbol federasiýalaryny degişli syýasaty kabul etmäge höweslendirmek, şeýle hem saglygy goraýşyň birnäçe meseleleri, şol sanda arassaçylyk we keselleriň öňüni alyş boýunça FIFA tehniki maslahatlary bermek ugurlarynda iş alyp barar.
Hyzmatdaşlyk şeýle hem milli assosiasiýalaryň, futbolçylaryň, tälimçileriň we meýletinçileriň gatnaşmagynda hem maksatnamalary we başlangyçlary öz içine alýar.
— Futbol — bu özboluşly uniwersal dil. Biz saglygy goraýyş we sagdyn durmuş ýörelgelerini bütin dünýäde wagyz ediş ulgamlarynda başlangyçlary goldamak üçin öz meýdançamyzy peýdalanmak isleýäris – diýip Žanni Infantino belledi.
Adamlar köpçüligini we jemgyýetleri köpçülikleýin başlangyjyň töwereginde birleşdirmekde sportuň möhümligi BMG-niň çäklerinde eýýäm öňden bäri durmuşa geçirilýär.
Belläp geçsek, BMG-niň Baş sekretarynyň orunbasary Amina Mohammediň belleýşi ýaly, BMG-niň 2030-njy ýyla çenli Gün tertibi sporty «durnukly ösüşi üpjün etmegiň serişdesi» hökmünde kesgitledi.