Bitaraplygyň 25 ýyllygyna we Garaşsyzlygyň 30 ýyllygyna ýubileý medallary taýýarlanylar

2020-nji ýylda Türkmenistanyň Bitaraplyk hukuk ýagdaýyna eýe bolmagyna 25 ýyl dolýar. Ýakynda geçirilen Ministrler Kabinetiniň mejlisinde döwlet Baştutany bu şanly senä bagyşlap halkara maslahatyny geçirmek, biziň ilçilerimiziň daşary ýurtlarda, şeýle hem Birleşen Milletler Guramasynda we beýleki halkara guramalarynda çykyşlaryny guramak boýunça tabşyryklary berdi.
Gurbanguly Berdimuhamedow B.Abdyýewa beýleki wise-premýer bilen bilelikde,bu şanly baýrama bagyşlanan dürli çäreleri, «tegelek stollary», maslahatlary, şol sanda dabaraly ýygnagy, aýdym-sazly çykyşlary guramagyň, şeýle hem mynasyp bolan adamlary döwlet sylaglary bilen sylaglamagy geçirmegiň tertibini taýýarlamagy tabşyrdy.
Merkezi bankyň başlygy M.Annadurdyýewe wise-premýer R.Meredow bilen bilelikde ýurdumyzyň Bitaraplyk hukuk ýagdaýyna eýe bolmagynyň 25 ýyllyk şanly baýramyna bagyşlanan ýubileý medalynyň taslamasyny taýýarlamak tabşyryldy.
2021-nji ýylda beýik Garaşsyzlygymyzyň 30 ýyllyk baýramyny giňden belläp geçeris. Şunuň bilen baglylykda, döwlet Baştutany Merkezi bankyň başlygy M.Annadurdyýewe Mejlisiň Başlygy G.Mämmedowa bilen bilelikde mynasyp adamlary sylaglamak üçin Garaşsyzlygyň 30 ýyllyk baýramyna bagyşlanan ýubileý medalynyň hem taslamasyny taýýarlamagy tabşyrdy we bu şanly baýramçylygy geçirmegiň anyk çäreleriniň bolsa şanly waka golaýlaşanda doly kesgitleniljekdigini nygtady.