Astrahanda türkmenistanly mugallym türkmen dilini okadyp başlady

Türkmenistanly türkmen dili mugallymy Resul Şajiýew 2019-njy ýylyň sentýabr aýynyň başyndan Russiýa Federasiýasynyň Astrahan welaýatynyň Priwolžsk etrabynyň Funtowo obasyndaky Magtymguly-Pyragy adyndaky umumy bilim berýän mekdebiniň okuwçylaryny türkmen dili dersleri boýunça okadyp başlady, bu barada Türkmenistanyň daşary syýasat edarasynyň saýty habar berýär. Resul Şajiýew rus tarapynyň çagyrmagy esasynda Astrahana bardy.
Bellenilişi ýaly, türkmen dili Astrahan welaýatynda ilkinji sapar okadylýar. Etnik türkmenleriniň ýaşaýan Funtowo obasynyň ýaşaýjylary bu habary uly şatlyk bilen garşyladylar. Şeýlelikde ilkinji sapaga diňe okuwçylar däl, eýsem, olaryň ene-atalary hem gatnaşdylar.
Bu ädimiň hoşniýetli goňşuçylyk we dostluk ýörelgelerine esaslanýan Türkmenistan bilen Russiýa Federasiýasynyň arasyndaky medeni-ynsanperwer gatnaşyklarynyň mundan beýläk-de ösdürilmegine ýardam etjekdigi şübhesizdir. Bu mekdepde türkmen dili diňe täze bilimleri öwrenmek üçin däl-de, eýsem türkmen halkynyň baý medeniýeti bilen has ýakyndan tanyşmak üçin giňişleýin peýdalanylar.
Bu mekdebiň Türkmenistanyň Prezidentiniň başlangyjy esasynda türkmen tarapy tarapyndan gurlandygyny bellemek zerurdyr.