Awazada innowasion tehnologiýalaryň sergisi öz işine başlady

11-nji awgustda Türkmenbaşy şäherinde Hazar innowasion tehnologiýalarynyň we «Türkmen sährasy — 2019» halkara sergileri öz işine başlady. Sergiler birinji Hazar ykdysady forumynyň çäklerinde gurnaldy.
Sergiler hazarýaka döwletleriniň we olaryň hyzmatdaşlarynyň ykdysadyýetiniň dürli pudaklarynyň gazananlaryny we mümkinçiliklerini şöhlelendirmäge gönükdirildi.
Sergide daşary ýurt kompaniýalarynyň 57-siniň we ýerli kompaniýalaryň 62-siniň diwarlyklary ýerleşdirildi. Onuň umumy meýdany 13,7 müň inedördül metre barabardyr. Sergä daşary ýurtly gatnaşyjylaryň hatarynda — «Thales», «Hyundai», «CNPC», «Petronas», «LG», «Schlumberger», «Dragon Oil», «Bouygues», «John Deere», «Itochu», «Zeppelin», «Vinci», «Sumitomo», «Huawei», «General Electric» we beýlekiler bar.
«Türkmen sährasy — 2019» awtomobil sergisinde «Azermaş» azerbaýjan awtomobil zawodynyň «Khazar» kysymly ýeňil awtomobili, «Iran Hodra» eýran awtoulaglary, «UzAuto Motors» özbek awtoulaglary, «МАЗ» belarus awtoulaglary, «Mercedes», «Volkswagen», «BMW», «Audi» german awtoulaglary, «Toyota», «Lexus», «Mitsubishi», «Mazda» ýapon awtoulaglary, «Hyundai» koreý we hytaýlaryň «Yutong» awtoulaglary görkezildi.
Sergide «Bentley» kysymly kaşaň hem rahat iňlis awtoulagy, «Lamborghini» kysymly gymmatbahaly italýan awtoulagy görkezildi.
Awtoulaglardan başga-da, sergide 1966-njy ýylda öndürilen «Chrysler» kysymly raritet motosikli hem-de iň häzirki zaman welosipedleri görkezildi. Pawilýonda jemi 70-den gowrak awtomobil ýerleşdirildi.
Hazar innowasion tehnologiýalarynyň sergisiniň çäklerinde birža söwdalary gurnaldy. Onda Türkmenistanda öndürilen önümleri görkezildi. Türkmenistanyň Döwlet haryt-çig mal biržasy tarapyndan geçirilen söwdalara ýüzden gowrak daşary ýurt kompaniýalary gatnaşdy.