Türkmen halylary «Amazon» we «Mercari» internet magazinlerinde satylyp başlandy

Dubaýda (BAE) «Al Fattan Shopping Centre» söwda merkeziniň binýadynda türkmen halylaryny, dokma we sowgatlyk önümlerini satmak bilen meşgullanýan «Berkarar General Trading LLC» türkmen kompaniýasy Amazon we Mercari internet söwda magazinlerinlerine önümlerini çykardy, diýip ORIENT agentligi habar berýär.
Birleşen Arap Emirliklerinde we Ýaponiýada türkmen halylary uly meşhurlykdan peýdalanýar. Bu ýurtlardan Türkmenistana dynç almaga gelýän syýahatçylar hökmany suratda ýanlary bilen gölli ýüpekden ýa-da ýüňden taýýarlanan «sowgatlyklary» alyp gaýdýarlar. Kimdir biri bir inedördül metrden uly bolmadyk halyçany alyp gitse, ýene birleri 30 inedördül metrden gowrak halyny alyp gidýärler. Indi türkmen halylaryny onlaýn görnüşde sargyt edip alyp bolýar. Satyn alnan halylar müşderä amatly usul arkaly iberilýär.
Täze onlaýn magazinler häzirki wagtda diňe BAE-niň we Ýaponiýanyň domenlerinden — Amazon.ae, Amazon.co.jp we Mercari.com/jp domenlerde elýeterlidir. Ýöne kompaniýa geljekde «Made in Turkmenistan» önümleriniň dürli görnüşlerini internet arkaly tutuş dünýä ýaýratmagy meýilleşdirýär.
«Berkarar General Trading LLC» kompaniýasynyň türkmen halylaryny satýan öz saýty bar. Ýöne iri halkara marketpleýslerde önümleriň ýerleşdirilmegi müşderiler tarapyndan gözlegleri we olar bilen özara gatnaşygy ýeňilleşdirýär. Söwda prosesi hem has ýönekeýleşýär — söwda platformalarynda tölegiň dürli görnüşleri arkaly geçirip bolýar, tehniki golda we kadalar ulgamy hereket edýär.
Öňräk «Berkarar General Trading LLC» kompaniýasy dünýäniň iň iri söwda internet-magazini bolan «Alibaba» saýtynda türkmen halylarynyň halkara söwdasyny ýola goýupdy.