Harby gullukçylar halas edijileriň türgenleşiklerini öwrenýärler

Türkmenistanyň Goranmak ministrliginiň Baş raýat goranyşy we halas ediş işleri müdirliginiň harby gullukçylary ýurdumyzyň Ýaragly Güýçleriniň şahsy düzüminiň arasynda ýygy-ýygydan okuw sapaklaryny geçirip, olara halas edijileriň esasy aýratynlyklaryny öwredýärler. Bu okuw sapaklarynyň esasy maksady esgerleri gulluk wagtlarynda we ätiýaja gidenlerinden soň duýdansyz, adatdan daşary ýagdaýlarda howsala düşmän dogry hereket etmäge taýýarlamaga gönükdirilendir. Bu barada «Milli goşun» saýty habar berýär.
Okuw-türgenleşiginde ussat halas edijileriň ulanýan tejribe tärlerine we «tehniki howpsuzlyk» diýen düşünjä has köp üns berilýär. Olaryň geçirilýän wagty tejribeli hünärmenler dürli adatdan daşary ýagdaýlary mysal getirip, şeýle ýagdaýlarda harby gullukçylara özlerini nädip alyp barmalydygyny we nähili hereket etmelidigini düşündirýärler.
Okuw-türgenleşiginde biziň ýurdumyzda gurulýan ýaşaýyş jaýlarynda, ýörite we önümçilik desgalarynda hemme howpsuzlyk kadalarynyň nazara alynýanlygy, dünýäniň iň gowy tejribesiniň ulanylýanlygy aýratyn nygtalýar. Adatdan daşary ýagdaýlaryň dörän ýagdaýynda halas ediji gulluklaryň sazlaşykly işi üçin zerur bolan çäreleriniň ählisi yzygiderli geçirilýär.