Türkmenistanda ýokary we orta hünär okuw mekdeplerine giriş synaglary başlandy. 2019-njy ýylda ýurdumyzyň ýokary okuw mekdeplerine 12 242 talyp kabul etmek meýilleşdirilýär, şol sanda 8 054 adam tölegli esasda bilim alar. Bu barada 27-nji iýulda «Нейтральный Туркменистан» gazeti habar berýär.
Synag geçýän auditoriýalarda ýörite wideokameralar oturdyldy. Isleg bildirýänler synagyň geçişine okuw mekdebiň çäginde oturdylan ekranlardan tomaşa edip bilerler.
Bellenilişi ýaly, ýurdumyz boýunça ilki bolup talyp diýen ada Oguz han adyndaky Inžener-tehnologiýalar uniwersitetine giriş synaglaryny üstünlikli tabşyran dalaşgärler eýe bolarlar. Bu ýokary okuw mekdebinde giriş synaglary awgust başlanmanka tamamlanar.
1-nji awgustda Türkmenistanyň Daşary işler ministrliginiň Halkara gatnaşyklary institutynyň 1-nji ýyl talyplarynyň atlary mälim bolar. Biraz soňra talyp şahadatnamalaryna Türkmen döwlet medeniýet institutynyň, Türkmenistanyň çeperçilik akademiýasynyň hem-de Maýa Kulyýewa adyndaky Türkmen milli konserwatoriýasynyň wekilleri eýe bolar.
Şu ýylky giriş synaglary möwsüminde ýurdumyzyň ýokary okuw mekdeplerinde 33 hünär artdy. Täze hünär ugurlary boýunça dalaşgärler D.Azady adyndaky Türkmen milli dünýä dilleri institutynda, Türkmen döwlet ykdysadyýet we dolandyryş institutynda, Türkmen döwlet maliýe institutynda, Türkmen oba hojalyk institutynda, Türkmen döwlet energetika institutynda, Türkmen döwlet medeniýet institutynda, Oguz han adyndaky Inžener-tehnologiýalar uniwersitetinde alynýar.
Oguz han adyndaky Inžener-tehnologiýalar uniwersitetinde — amaly matematika we informatika; öýjükli we malekulýar biologiýa; genetika we bioinžinerçilik; himiki inženerçilik; sanly ykdysadyýet; sanly infrastruktura we kiber howpsuzlyk; mobil we tor inženerçiligi; animasiýa we grafiki dizaýn; innowasion ykdysadyýet; personaly dolandyrmak; häzirki zaman tehnologiýalarynyň fizikasy ýaly hünärler döredi.
Türkmenistanyň Telekommunikasiýalar we informatika institutynda — maglumat ulgamlary we tehnologiýalary; programma inžinerçiligi; kompýuter ulgamlarynyň programma üpjünçiligi; amaly informatika; biznes-informatika; maglumat howpsuzlygy; senagat elektronikasy; elektron howpsuzlyk ulgamlary ýaly hünärler peýda boldy. Ýurdumyzyň orta hünär okuw mekdeplerinde hem bilim almaga köpsanly dalaşgär isleg bildirdi.
Ýurdumyzyň tutuş çäginde dürli ugurlara degişli orta hünär okuw mekdepleriniň ulgamy hereket edýär. Olar maliýe-ykdysady, bank, gurluşyk, lukmançylyk, mugallymçylyk, medeniýet we sungat, nebitgaz, energetika, söwda, oba hojalygy, neşirýat işi, syýahatçylyk, deňiz we demir ýol ulagy, howa ulaglary ýaly ugurlar boýunça hünärmenleri taýýarlaýarlar.
Umuman, ýokary we orta hünär okuw mekdeplerine giriş synaglary awgust aýynyň 17-sine çenli dowam eder.
Türkmenistanyň ýokary okuw mekdeplerine giriş synaglary badalga aldy
- 28.07.2019 01:38
- 7.5k+
![Türkmenistanyň ýokary okuw mekdeplerine giriş synaglary badalga aldy](https://tmcars.info/tmcars/images/original/2019/07/28/01/38/4381e145-12ce-455f-a8ea-481d4880e350.jpg)