Türkmenistanyň Prezidenti obada işleýän mugallymlaryň zähmet hakyna goşmaça töleg goşmagy tabşyrdy

Ministrler Kabinetiniň şu ýylyň ýanwar-iýun aýynda ýurdumyzyň durmuş-ykdysady ösüşiniň netijelerine bagyşlanyp geçirilen mejlisde Prezident Gurbanguly Berdimuhamedow bilim ulgamyna gözegçilik edýän wise-premýere Ministrler Kabinetiniň Başlygynyň orunbasary G.Myradow bilen bilelikde, oba ýerlerinde mugallymlaryň iş meselesini öwrenmegi tabşyrdy. Döwlet Baştutany obada işleýän mugallymlaryň zähmet hakyna ep-esli möçberde goşmaça töleg goşmaly, şeýle hem olaryň ýeňillikli şertlerde ýaşaýyş jaýlary bilen üpjün edilmelidigini nygtap, bu babatda teklipleri taýýarlamagy tabşyrdy.
Biz bilim özgertmelerini geçirmegiň depginini çaltlandyrmalydyrys diýip, Gurbanguly Berdimuhamedow belledi. Mekdebi tamamlan ýaşlar, gaýtadan okamazdan, telekeçilik düzümlerinde kynçylyksyz işlemelidir. Munuň üçin bolsa mekdep maksatnamalary boýunça telekeçilik işiniň ýönekeý düzgünleri, iň bolmanda, bu ugurdaky kanunlar köpräk öwredilmelidir diýip, döwlet Baştutany bu talabyň ýokary okuw mekdeplerine hem degişlidigini aýtdy.
Ähli ugurdaş institutlar, aýratyn-da, Türkmen döwlet ykdysadyýet we dolandyryş institutynda ýokary derejeli dolandyryş işgärleri taýýarlanylmalydyr, bu ugurda dünýä belli beýleki ugurdaş institutlar bilen hyzmatdaşlyk edip, daşary ýurtly hünärmenler işe çekilmelidir. Şeýle hem talyplary tölegli esasda okatmak usulyna geçilmelidir diýip, Türkmen Lideri belledi.
Mundan başga-da, Türkmenistanyň Prezidenti IT — merkezi üçin binalar toplumynyň taslamasyny düzmegi, onuň ýerleşdiriljek ýerini saýlamagy tabşyrdy. Ilkinji nobatda, maglumat tehnologiýalary merkezi üçin zerur bolan işgärler taýýarlanmalydyr.