Türkmenistan kiber giňişligiň goragçylaryny taýýarlaýar

Şu okuw ýylynda Türkmenistanyň Goranmak ministrliginiň Beýik Saparmyrat Türkmenbaşy adyndaky Harby institutynda «kiber giňişligiň goragçylary» taýýarlanylyp başlandy. Harby institutda maglumat howpsuzlygy, awtomatlaşdyrylan dolandyryş we programma üpjünçiligi hünärleri boýunça harby talyplary taýýarlaýan kafedra açyldy. Bu barada Türkmenistanyň Goranmak ministrliginiň «Milli goşun» žurnalynyň saýty habar berýär.
Bu hünärler boýunça okuw geçip başlan geljekki serkerdeler milli goşunymyzda häzirki zaman kiber garşylyklara we howplara garşy göreşmek üçin dünýä derejesinde tejribe toplarlar. Täze kafedranyň döredilmegi hormatly Belent Serkerdebaşymyzyň tarapyndan tassyklanan Sanly ykdysadyýeti ösdürmegiň konsepsiýasynyň çäklerinde amala aşyrylýan döwlet ähmiýetli işleriň biridir.
Häzirki zaman ýaşaýşyny sanly ulgamsyz göz öňüne getirmek mümkin däl. Biziň täze özgertmelere we ösüşlere tarap batly gadam bilen barýan ýurdumyz döwletara maglumatlar giňişliginde mynasyp orun eýeleýär. Şu nukdaýnazardan, milli goşunymyz üçin kiber howpsuzlygy boýunça ýokary bilimli hünärmenleri taýýarlamak – döwrüň talaby bolup durýar.