«Türkmenhowaýollary» halkara uçuş ugurlarynyň sanyny artdyrýar

«Türkmenistan» awiakompaniýasy 3-nji iýuldan 11-nji sentýabr aralygynda «Boeing 737-800» uçary arkaly Aşgabat — Kazan howa gatnawlarynyň ýygylygyny artdyrar. Goşmaça gatnaw Aşgabatdan her çarşenbe güni 6 sagat 25 minutda uçar.
Şeýle hem «Türkmenhowaýollary» agentligi Aziýa-Ýuwaş ummany sebitiniň döwletleri bilen göni howa gatnawyny ýola goýmak boýunça hem işleri alyp barýar. Netijede, Tokio-Aşgabat-Tokio ilkinji howa gatnawy ýola goýuldy. «Aşgabatsyýahat» döwlet syýahatçylyk kärhanasy «Türkmenhowaýollary» agentligi bilen bilelikde ýaponiýaly syýahatçylar üçin 26-30-njy iýun aralygynda ýörite syýahatçylyk uçuşyny gurnady. Bu barada «Türkmenistan: Altyn asyr» elektron neşiri habar berýär.
Mundan başga-da, «Boeing 777-200 LR» uzak aralyk üçin niýetlenilen häzirki zaman uçarlarynda Hoşimin (Wýetnam) şäherine yzygiderli howa gatnawlary ýerine ýetiriler. Şeýle hem Malaýziýanyň paýtagty Kuala-Lumpura yzygiderli howa gatnawlary gaýtadan dikeldildi.
Awiatorlar Günorta-Gündogar Aziýanyň dini ýadygärliklerine zyýarat edýän syýahatçylaryň howa gatnawynyň Aşgabadyň amatly geografik ýerleşişinden peýdalanyp, üstaşyr gatnawlary gurnamagyň üstünde işleýärler. Türkmen howa gämileri ýolagçylary Aşgabatdan Saud Arabystany Patyşalygynyň Jidda şäherine äkider.
Häzirki wagtda Ýewropanyň, Türkiýäniň, GDA döwletleriniň, Tailandyň we Wýetnamyň syýahatçylarynyň Aşgabadyň howa menziliniň üsti bilen üstaşyr Arap ýarym adasyna uçuş etmäge mümkinçilik berjek ugurlar işlenip düzülýär. Täze ugurlar şu ýylyň noýabr aýynda açylar.