Russiýa Türkmenistan bilen türkmen gazyny satyn almak biýunça bäş ýyllyk şertnama baglaşmagyň mümkinçiliklerini maslahatlaşýar. Satyn almalar ýylyň ikinji ýarymyndan başlanyp bilner, diýip Trend agentligi habar berýär.
Russiýanyň energetika ministriniň orunbasary Anatoliý Ýanowskiniň Berlinde geçirilen «Russiýa bilen ÝB-niň energetika hyzmatdaşlygynyň mümkinçilikleri. Gaz ugry» atly halkara maslahatynyň çäklerinde aýtmagyna görä, häzirki wagtda bäş ýyl möhlet bilen ýakyn geljek üçin şertnama baglaşmak boýunça gepleşikler tamamlanyp barýar. Şu ýylyň ikinji ýarymyndan gaz iberilip başlanmagy mümkin.
A.Ýanowskiniň aýtmagyna görä, häzir taraplar ibermeleriň möçberini maslahatlaşýarlar, bu bolsa öz gezeginde gazyň bahasyna baglydyr. Rus tarapy türkmen gazynyň Russiýa akdyrylyş möçberiniň 2016-njy ýyla çenli derejesine çykyp biljekdigini aýtdy. Gepleşikler iýunyň dowamynda tamamlanar.
Belläp geçsek, Türkmenistan üç ýyllyk arakesmeden soňra 15-nji aprelden başlap, tebigy gazyny Russiýa ibermegini gaýtadan ýola goýdy. 2019-njy ýylyň 30-njy iýunyna çenli «Gazprom» 1,155 milliard kub metr gaz satyn almagy meýilleşdirýär.
