Aşgabatda Türkmenistanyň Bilim ministrligi tarapyndan her ýylda geçirilýän «Ýylyň mugallymy» we »Ýylyň terbiýeçisi» bäsleşiginiň netijeleri yglan edildi. Bäsleşigiň jemleýji tapgyrlary Aşgabatdaky № 128-nji çagalar bagynda we №89 orta mekdebinde geçirildi. Şu ýyl «Ýylyň mugallymy – 2019» diýen hormatly ada Daşoguz şäheriniň 25-nji ýöriteleşdirilen orta mekdebiniň başlangyç klas mugallymy Amangül Sopyýewa eýe boldy. «Ýylyň terbiýeçisi – 2019» diýen ada bolsa, Aşgabatdaky 65-nji mekdebe çenli çagalar edarasynda işleýän Leýla Haýtekowa mynasyp boldy.
Bäsleşigiň saýlama tapgyrlarynda oňa gatnaşyjylar şertlere görä, täze toparda açyk sapak berdiler. Şunda nätanyş çagalaryň auditoriýasyna öwrenişmek boýunça hünär başarnygy eminleriň esasy üns merkezinde boldy. Bäsleşige Türkmenistanyň Milli Bilim institutyndan, D.Azady adyndaky Türkmen milli dünýä dilleri institutyndan, A.Kekilow adyndaky Aşgabatdaky Mugallymçylyk mekdebinden, Türkmenistanyň Kärdeşler Arkalaşyklarynyň milli merkezinden, «Mugallymlar gazetiniň» redaksiýasyndan wekiller eminlik etdiler.
Bäsleşikde ýeňijilere Türkmenistanyň Bilim ministrliginiň diplomlary we Hormat hatlary, şeýle hem ýadygärlik sowgatlar gowşuryldy.
