Adybir sosial tory bolan amerikan Twitter kompaniýasy 2022-nji ýylyň 13-nji sentýabrynda ýörite ýygnak geçirer. Onda paýdarlar mikrobloglar hyzmatyny telekeçi Ilon Maska bermek baradaky geleşigiň mundan bu ýanky ykbaly bilen bagly meseläni sese goýarlar.
Bu barada paýdarlara ugradylyp, nusgasy sişenbe güni ABŞ-nyň Gymmatly kagyzlar we biržalar boýunça iş toparynyň saýtynda çap edilen habarda aýdylýar.
"Ýörite ýygnak 2022-nji ýylyň 13-nji sentýabrynda geçiriler (...). Ýörite ýygnakda sizden (...) X Holdings I, Inc bilen goşulyşmak babatynda 2022-nji ýylyň 25-nji aprelindäki ylalaşygy we meýilnamany makullamak hakyndaky teklip boýunça ses bermegi haýyş ederler" - diýip habarda aýdylýar.
Hatda kompaniýanyň "Jenap Mask bilen ylalaşylan bahalar we şertler boýunça geleşigi ýapmaga razydygy", kompaniýanyň direktorlar geňeşiniň paýdarlara telekeçi bilen geleşige razy diýip ses bermegi maslahat berýändigi nygtalýar.
Aprelde Twitteriň ýolbaşçylary sosial tory Maskyň 44 mlrd dollara satyn almak isleýändigini habar beripdiler. Maý aýynda telekeçi Twitterde galp we köpçülige ýollanýan mahabat habarlary üçin ulanylýan hasap ýazgylarynyň umumy sanyň 5 %-digini tassyklaýan maglumaty almaga synanyşýandygyny mälim edipdi.
Iýulyň başynda Maskyň ýuristleri telekeçiniň Twitteri satyn almakdan boýun gaçyrýandygy barada kompaniýany habarly edipdi.
