Türki Döwletleriň Guramasynyň Baş sekretary Bagdad Amreýew Türkmenistanyň Prezidentiniň adyna hat ýollady. Onda şu ýylyň 12-nji noýabrynda Stambul şäherinde guralan Türki Döwletleriň Guramasynyň 8-nji sammitiniň üstünlikli geçirilmegine uly goşant goşandygy üçin türkmen Liderine hoşallyk bildirilýär.
Hatda: «Bu sammit halkara jemgyýetçiligiň hem-de türki döwletleriň ünsüni çekdi. Siz ýokary derejedäki bu duşuşygyň türki döwletleriň raýdaşlygynyň we bitewüliginiň pugtalanmagynda aýratyn, taryhy ähmiýetiniň boljakdygyny dogry bellediňiz. Türkmenistanyň bu sammite gatnaşmagy onuň keşbine täzeçillik çaýdy hem-de Türki Döwletleriň Guramasyna Türkmenistanyň goşulmagy baradaky öňdengörüjilikli çözgüdiňiz, hakykatdan-da, Siziň ýurduňyz bilen türki döwletleriň arasyndaky hyzmatdaşlygyň hil taýdan ýokary tapgyrynyň başlanýandygyny alamatlandyrdy» diýip, guramanyň Baş sekretary Türkmenistanyň ygtybarly hem-de jogapkärli hyzmatdaş hökmünde “Türki dünýä garaýyş — 2040” resminamasynda berkidilen geljekki maksatlary we wezipeleri üstünlikli durmuşa geçirmäge möhüm goşant goşup biljekdigine ynam bildirdi.