Gonkongda Aziýadaky iň gymmat kwartira satyldy

Gonkongda Aziýadaky iň gymmat kwartira satyldy

Gonkongda Aziýadaky iň gymmat kwartira bir meýdanyň bahasyny göz öňünde tutup, 82 mln dollara satyldy. Bu barada “South China Morning Post” gazeti habar berdi diýip, TASS belleýär.

Ýagny, gürrüň milliarderleriň ornaşmak isleýän Pik Wiktoriýa baýyrlygynda ýerleşýän Mount Nicholson täze ýaşaýyş toplumyndaky kaşaň emläk barada gidýär. Jaýyň her bir inedördül futy (0,09 inedördül metr) şertnama goşulan üç awtomobil duralgasy bilen bilelikde alyja 18 müň dollara düşdi, bu hem sebitde rekord derejeli baha boldy.
Mundan başga-da, ady agzalmaýan bu maýa goýujy şol toplumda bahasy 72 mln dollar bolan ýene bir jaýy satyn aldy.
Rieltorlaryň aýdyşyna görä, Gonkongda kaşaň gozgalmaýan emläklere bolan isleg dekabr aýynyň ortalaryndan karantinsiz gatnawlar üçin pandemiýa başlany bäri ýapyk bolan Hytaý bilen gury ýer serhedini kem-kemden açmak meýilnamasy baradaky habarlardan soň ýene ýokarlanyp başlady. 
Şu ýylyň tomsunda şol ýaşaýyş toplumynda dünýädäki iň gymmat awtoduralga ýeri 1,3 mln dollara satyldy.
Gonkongyň täjirçilik gozgalmaýan emläk bazary dünýäde iň gymmady hasaplanýar. Geçen hepde Gonkongyň iş merkezindäki ýer bölegi hökümet auksionynda rekord baha – 6,5 mlrd dollara satyldy.