SpaceX Hindistanda golçur kärhanasyny döretdi

SpaceX Hindistanda golçur kärhanasyny döretdi

Ilon Maskyň SpaceX kompaniýasynyň bölümçesi Starlink Hindistanda golçur kärhanasyny döretdi. Kompaniýa Hindistanyň hökümetinden rugsat alan ýagdaýynda 2022-nji ýylyň dekabr aýyndan ýurtda hemra aragatnaşygy arkaly giň zolakly internet hyzmatlaryny hödürläp başlamagy meýilleşdirýär. Bu barada “The Hindu” gazeti habar berýär diýip, TASS belleýär.

“Men SpaceX-iň indi Hindistanda 100 göterim golçur kärhanasynyň bardygyny habar bermäge şat. Ol 2021-nji ýylyň 1-nji noýabrynda hasaba alyndy. Kompaniýa Starlink Satellite Communications Private Limited (SSCPL) diýlip atlandyrylýar. Indi biz ygtyýarnama üçin arza bermäge, bank hasaplaryny açmaga we ş.m başlap bilýäris” – diýip, gazet Hindistanda Starlink-iň sebit müdiri Sanjaý Bhargawyň sözlerini getirýär.

Onuň aýtmagyna görä, Starlink Hindistandan 5 müňden gowrak deslapky sargydy aldy. Kompaniýa her müşderiden $99 ýa-da 7350 rupiýa möçberinde girew alyp, beta-synag döwründe maglumatlary ibermegiň tizligini sekuntda 50-den 150 megabit aralygynda üpjün edýändigini nygtaýar.

Oktýabr aýynda ABŞ-nyň Starlink we Amazon kompaniýalary Hindistana hemra arkaly giň zolakly aragatnaşygy döretmekde kömek bermegi teklip etdiler.

Amazon Kuiper taslamasy arkaly Hindistanda hemra internet hyzmatlaryny döretmäge maýa goýmak isleýär. Onuň üstünlikli durmuşa geçirilmegi kompaniýanyň ýolbaşçysy Jeff Bezosa Hindistanyň internet söwdasynyň ep-esli bölegine gözegçilik etmäge mümkinçilik berer.