Dünýädäki döwletleriň, takmynan, 80%-i belli bir möhlete çenli uglerod bitaraplygyny gazanmagy maksat edinýär. Bu barada Glazgoda açylan BMG-niň Howanyň üýtgemegi baradaky Çarçuwaly konwensiýasynyň taraplarynyň 26-njy konferensiýasynyň (COP26) başlygy Alok Şarma metbugat konferensiýasynda aýtdy diýip, TASS habar berýär.
“Häzirki wagtda ýurtlaryň 80%-e golaýy belli bir möhlete çenli uglerod bitaraplygyny gazanmagy maksat edinýär, bu birnäçe ýyl ozalkydan ep-esli köpdür. COP26 global temperaturanyň ýokarlanmagyny bir ýarym gradusyň çäginde saklamagyň amal edip boljak wezipedigini görkezmäge gönükdirilýär” – diýip, ol aýtdy. Şarmanyň bellemegine görä, bu meselede G20 ýurtlarynyň orny aýratyn möhümdir, çünki ähli bug zyňyndylarynyň, takmynan, 80%-i olaryň paýyna düşýär.
COP26-yň başlygy G7 ýurtlarynyň global derejede kömür energetikasyny maliýeleşdirmegi bes etmek baradaky kararynyň soňky aýlarda howanyň üýtgemegine garşy göreşe möhüm goşant goşandygyny belledi.
Şol bir wagtyň özünde, ol ösüp barýan ýurtlarda ýaşyl energetika geçişiň has ösen ýurtlaryň maliýe goldawy bilen amala aşyrylmalydygyna ünsi çekdi. Şunuň bilen baglylykda, ol Kanadanyň we GFR-iň ýolbaşçylygynda global ýylama garşy göreşiň halkara maliýeleşdirilmesini ýokarlandyrmagyň anyk mehanizmini taýýarlamak boýunça alnyp barylýan tagallalary belläp geçdi. “2023-nji ýyla çenli ösen ýurtlar bu maksatlar üçin ýylda 100 mlrd dollar berip bilerler. 2025-nji ýyla çenli bolsa umumy bäş ýyllyk döwürde 500 mlrd dollardan gowrak pul ýygnalar” – diýip, Şarma aýtdy.
