Samsung birnäçe smartfon üçin awtomobilleri işleder ýaly sanly açar funksiýasyny işjeňleşdirdi. Bu barada “SamMobile” neşirine salgylanyp, Day.Az habar berýär.
Sentýabr aýynyň ahyryndan başlap, Samsung-yň käbir flagman smartfonlary awtomobil açmagy öwrendiler. Koreýanyň kompaniýasynyň wekilleriniň aýtmagyna görä, häzirki wagtda sanly açar funksiýasy diňe täze Genesis GV60 elektromobili bilen işlär.
Bu mümkinçilik NFC we UWB tehnologiýalary arkaly amal edildi. Funksiýanyň kömegi bilen uzak aralykdan hereketlendirijini işletmek we ulagy gyzdyrmak, gapylary we ýük goýulýan ýeri açmak, aýnalaryň we oturylýan ýerleriň durşuny sazlamak bolýar. Şeýle-de, sanly açary garyndaşlaryň we dostlaryň bilen paýlaşmak bolýar. Munuň üçin olara çäkli wagtyň dowamynda ulagdan peýdalanmak hukugyny bermeli.
Häzirki wagtda funksiýa Günorta Koreýanyň çäklerinde elýeterli, geljekde ol beýleki sebitlerde hem peýda bolar. Ol Galaxy Note 20 Ultra, Galaxy S21+, Galaxy S21 Ultra, Galaxy Z Fold 2 we Galaxy Z Fold 3 flagman smartfonlarynda işleýär.
“Biziň maksadymyz UWB ýaly mobil tehnologiýalary ösdürmegi dowam etdirmek bilen, ekoulgam boýunça ygtybarly hyzmatdaşlarymyz bilen bilelikde bu täze mümkinçilikleri has köp adama hödürlemekden ybaratdyr” – diýip, Samsung Electronics TM Po (TM Roh) mobil kommunikasiýa bölüminiň prezidenti belledi.
