Tesla kompaniýasy Model 3 elektrik sedanynyň üstünligi baradaky habar bilen paýlaşdy. Tutuş taryhyň dowamynda bu ulagdan eýýäm 1 milliondan gowragy, has anyk aýdanymyzda, 1 031 588 sanysy satyldy. Bu barada carsweek.ru habar berýär.
Ikinji çärýek hasam üstünlikli boldy – bu döwrüň üç aýynda satuw mukdary 225 müň birlige ýetdi. Beýleki ulaglar barada gürrüň edilende, Tesla Model Y elektromobili 250 müň gezek satyn alyndy, şu ýylyň ahyryna çenli amerikan kompaniýasynyň wekilleri 500 müň nusga barada habar bermegi meýilleşdirýärler.
Has gymmat bolan Tesla Model S bilen Tesla Model X-iň satuwy pes boldy. Olardan 200 müň birlik satyldy. Tesla üçin bäsdeş hökmünde beýleki brendleriň wekilleriniň arasyndan ykjam Nissan Leaf awtomobilini görkezmek bolar. Bu awtomobile dünýäniň, takmynan, 500 müň adamy eýeçilik edýär.
Häzirki wagtda Tesla-nyň iň uly bazary ABŞ-dyr. Ilon Maskyň kompaniýasy bu ýurtda elektromobil bazarynyň, takmynan, 70%-ine gözegçilik edýär. Tesla-nyň Hytaýda-da orny uly: 2021-nji ýylyň birinji ýarymynda Hytaýda elektromobil satuwy 1,12 million birlige ýetdi, 161 müňden gowragy hem Tesla modelleriniň paýyna düşdi.
Tesla-nyň maliýe hasabatynda kompaniýanyň şu ýylyň birinji ýarymynda 386 050 awtomobil satandygy görkezilýär. Ýylyň ahyryna çenli kompaniýanyň satuw göwrümi 800 müň ulagdan geçip biler.