Xiaomi kompaniýasy özüniň ikinji modeli bolan YU7 elektrokrossoweriniň ibermelerine başlady. Ilkinji awtoulaglar Hytaýyň 58 şäherindäki eýelerine gowşuryldy. Emma ýokary isleg we önümçilik kuwwatynyň çäklidigi sebäpli, bu ulagyň esasy görnüşi üçin garaşmaly wagt 62 hepdä ýetdi diýip, «Cnevpost» habar berýär.
Şol bir wagtyň özünde, has gymmat bolan Pro we Max görnüşleriniň garaşylýan wagty has gysga – degişlilikde 56 we 48 hepde.
YU7-ä bolan isleg şeýle bir güýçli boldy welin, sargytlar açylan badyna ilkinji üç günde 315 müňden hem köp ýüzlenme gowşupdyr. Şeýle-de bolsa, häzirki zawod ýylyň dowamynda diňe iki modelden jemi 150 müň awtoulag öndürip bilýär.
Ilkinji alyjylaryň käbirine awtoulaglary kompaniýanyň ýolbaşçysy Leý Szýunyň hut özi gowşurypdyr. Onuň sözlerine görä, YU7-ni satyn alýanlar esasan iki topara bölünýär: tehnologiýa we dinamika muşdaklary, şeýle hem elektrokrossowerini gündelik ulagy hökmünde görýän çagaly maşgalalar.
Awtoulagy ilkinjileriň hatarynda almak üçin, sargytlar başlanan badyna ýüz tutup, 20 müň ýuana barabar goýum goýmak zerurdy.
Elektrokrossower üçin şeýle uzak garaşmak ýagdaýy ýakyn aýlarda üýtgäp biler: Xiaomi tomsuň ahyryna çenli ikinji zawodyny işe girizmegi meýilleşdirýär, häzirki wagtda şol zawod üçin işgärler kabul edilýär. Täze zawod önümçilige başlasa, nobatyň wagty azalsa gerek.
