Raisi Eýranyň Prezidenti wezipesine saýlandy

Raisi Eýranyň Prezidenti wezipesine saýlandy

17,9 mln ses alan Ebrahim Raisi Eýranyň prezident saýlawlarynda ýeňiji diýlip resmi taýdan yglan edildi. Bu barada şenbe güni Eýranyň Içeri işler ministri Abdolrezy Rahmani Fazli mälim etdi diýip, TASS belleýär.

Prezident saýlawlarynda saýlawçylaryň umumy gatnaşygy 48,8% boldy, jemi 28,9 mln adam ses berdi.

“13-nji prezident saýlawlaryna gatnaşan 28 933 004 adamdan 17 926 345-si Ebrahim Raisä ses berdi” – diýip, ol aýtdy we gatnaşygyň 48,8% bolandygyny sözüniň üstüne goşdy. Şeýlelik bilen, bu görkeziji Eýranyň häzirki zaman taryhynda rekord derejede pes boldy. Ministriň çykyşy döwlet telewideniýesi tarapyndan ýaýlyma berildi.

Onuň aýtmagyna görä, kabul edilýän kararlaryň maksadalaýyklygy boýunça Geňeşiň sekretary Mohsen Rezai 3 412 712 ses, Eýranyň Merkezi bankynyň ozalky ýolbaşçysy Abdolnaser Hemmati 2 427 201 ses, Mejlisiň (parlament) başlygynyň orunbasary Amir Hoseýn Kazizade Haşemi 999 718 ses aldy. 
Häzirki prezident Hasan Rouhani bu wezipäni yzygiderli iki möhlet eýeländigi üçin, saýlawlara gatnaşmady. Saýlawlara jemi ýedi dalaşgär kabul edildi, ýöne olaryň üçüsi saýlaw kampaniýasynyň soňky gününde gatnaşmakdan boýun gaçyrdy.
Eýranyň prezidenti ählumumy ses berme bilen dört ýyl möhlete saýlanýar we ol bu wezipäni yzygiderli iki möhletden artyk eýeläp bilýär.