Apple kompaniýasy 23-nji martda 2021-nji ýyldaky ilkinji tanyşdyryş dabarasyny geçirer diýip, evo-rus.com habar berýär.
Ilkibaşda anons 16-njy martda bolar diýlip garaşylýardy, ýöne soňrak Bloomberg-iň synçysy bu gürrüňleri ret etdi. Eger tanyşdyryş, hakykatdanam, 23-ine meýilleşdirilen bolsa, Apple muny bir hepde öňünden, ýagny 16-njy martda yglan eder. Anonsyň özi onlaýn görnüşde geçer.
Onda AirTags trekerleriniň we iPad Pro planşetiniň (2021) görkezilmegine garaşylýar. Soňkusy 5G ulgamyna we kuwwatly A14X Bionic çipsetine eýe bolmaly.
Apple ýylda azyndan iki çäräni geçirýär – ýylyň ortalarynda (iýun) geçirilýän WWDC konferensiýasy we adatça güýze (sentýabr) meýilleşdirilýän täze nesliň iPhone smartfonlarynyň tanyşdyrylyş çäresi. Mundan başga-da, kompaniýa ýylyň başynda we ahyrynda iPad we Mac-yň täze wersiýalaryna bagyşlanan beýleki çäreleri hem geçirýär, ýöne olaryň möhleti üýtgäp biler.
Şeýle-de, 23-nji martda Hasselblad kameraly täze flagman smartfonlaryny hödürlemeli OnePlus kompaniýasynyň hem tanyşdyryş dabarasy meýilleşdirilýär.
