Bütindünýä söwda guramasynyň baş direktory wezipesine ilkinji gezek zenan maşgala saýlanyldy

Bütindünýä söwda guramasynyň baş direktory wezipesine ilkinji gezek zenan maşgala saýlanyldy

Nigeriýaly ykdysatçy Ngozi Okonji-Iweala Bütindünýä söwda guramasynyň (BSG) baş direktory wezipesine bellendi. Ol bu wezipäni eýelän ilkinji zenan maşgala we ilkinji afrikaly boldy. Hanym Okonjo-Iweala ýörite umumy ýygnakda BSG-niň ýolbaşçysy hökmünde tassyklandy. Bu barada guramanyň resmi saýty habar berýär.

Ol wezipesine 1-nji martdan girişer we guramanyň ýedinji baş direktory bolar. Ngozi Okonjo-Iwealanyň ygtyýarlyk möhleti 2025-nji ýylyň 31-nji awgustynda tamamlanar. 
Okonjo-Iweala bu wezipede esasy maksadynyň ykdysadyýetde we saglygy goraýyş pudagynda COVID-19 pandemiýasynyň ýetiren täsirlerini çalt ýok etmek boýunça işleriň boljakdygyny aýtdy.
Hanym Okonjo-Iweala 1982-2003-nji we 2007-2011-nji ýyllarda Bütindünýä bankynyň ýolbaşçylygynda jogapkär wezipelerde işledi. 2003-2006-njy we 2011-2015-nji ýyllarda Nigeriýanyň Maliýe ministrligine ýolbaşçylyk etdi (2006-njy ýylda bir wagtda DIM-iň başlygy). Soňky wagtlar Ngozi Okonjo-Iweala Sanjymlar we immunizasiýa boýunça global birleşigiň edarasynyň başlygy, Ykdysadyýet we klimat boýunça global komissiýanyň egindeş başlygy bolup işledi.
Täze baş direktory saýlamak işi 14-nji maýda, Robertu Azewedu BSG-niň agzalaryna ygtyýarlyk möhletiniň tamamlanmazyndan bir ýyl öň BSG-niň ýolbaşçysy wezipesinden çekiljekdigini aýdanynda başlady. 31-nji awgustda ol wezipesinden gitdi.