Russiýanyň Göni maýa goýum gaznasy bilen Hindistanyň Dr.Reddy’s Laboratories Ltd farmasewtik kompaniýasy koronawirusa garşy “Sputnik V” sanjymynyň ikinji we üçünji tapgyr kliniki synaglaryna başlady. Bu barada Hindistanyň Dr.Reddy’s Laboratories Ltd kompaniýasynyň metbugat relizine salgylanmak bilen TASS habar berýär.
“Hindistanda Derman serişdeleriniň merkezi barlaghanasyndan zerur tassyklama alnandan soň, “Sputnik V” sanjymynyň kliniki synaglarynyň ikinji we üçünji tapgyryna başlanyldy. Bu howpsuzlyk we immunogen barlaglaryny öz içine aljak tötänleýin gözegçilik synagy bolar” – diýlip, kompaniýanyň habarynda aýdylýar. Rus sanjymynyň kliniki synaglary JSS Medical Research kompaniýasy tarapyndan geçirilýär.
Ýatlap geçsek, “Sputnik V” sanjymy Russiýanyň Saglygy goraýyş ministrliginiň Gamaleýa merkezi tarapyndan işlenilip taýýarlandy we iýun-iýul aýlarynda kliniki synaglardan geçdi. Oktýabr aýynda Russiýanyň Göni maýa goýum gaznasy bilen Dr.Reddy’s Hindistanyň çäginde “Sputnik V” sanjymynyň ikinji we üçünji tapgyr synaglaryny geçirmek üçin tassyknama aldy, noýabr aýynda derman serişdesiniň birinji toplumy Haýdarabat şäherine iberildi.
