Louis Vuitton-yň ýolbaşçysy iň baý adamlaryň reýtinginde ikinji orny eýeledi

Louis Vuitton-yň ýolbaşçysy iň baý adamlaryň reýtinginde ikinji orny eýeledi

Louis Vuitton Moet Hennessy (LVMH) kompaniýalar toparynyň prezidenti Bernar Arno bir hepdede (15-den 22-nji oktýabr aralygynda) özüniň baýlygyny $8 mlrd ýokarlandyrdy diýip, “Forbes” žurnaly habar berýär. Muny REGNUM agentligi ýetirýär.

Oktýabrda Louis Vuitton täze koronawirus ýokanjyndan soň gözellik harytlarynyň dünýä bazarynda dikelişiniň başlanandygyny görkezýän hasabaty neşir etdi. Bu habar LVMH-iň paýnama bahasynyň ösmegine getirdi. Bir hepdede paýnamalar 6% gymmatlady.
Muňa garamazdan, 15-nji oktýabrda LVMH holdingi şu ýylyň dokuz aýynda girdejiniň 21% pese gaçandygyny habar berdi. Onuň kosmetika, içgiler we şaý-sep önümleri bilen meşgullanýan kärhanalary şu ýylyň üçünji çärýeginde geçen ýylyň degişli döwri bilen deňeşdirilende, girdejiniň has pes bolandygyny habar berdiler. Şol bir wagtda kompaniýanyň iň uly bölümi bolan moda biznesi 12% ösüş görkezdi.
24-nji oktýabra çenli Bernar Arnonyň umumy baýlygy 122 mlrd dollara çenli ýokarlandy. Netijede, Arno “Forbes” tarapyndan düzülýän dünýäniň iň baý adamlarynyň reýtinginde ikinji orny eýeledi. Häzirki wagtda reýtingde birinji orny $188,6 mlrd baýlygy bilen Amazon kompaniýasyny esaslandyryjy Jeff Bezos eýeleýär. Üçünji orunda Microsoft korporasiýasynyň ozalky ýolbaşçysy Bill Geýts, dördünji orunda Facebook-y esaslandyryjy Mark Sukerberg, bäşinji orunda SpaceX we Tesla kompaniýalarynyň ýolbaşçysy Ilon Mask ýerleşýär.