Käbir türkmen ýokary okuw mekdepleriniň 4-nji we 5-nji ýyl talyplary okuwlary onlaýn tertipde okap başladylar. Muny Telekommunikasiýa we informatika institutynyň, şeýle hem Halkara ynsanperwer ylymlary we ösüş uniwersitetiniň talyplary tassyklaýar diýip, ORIENT habar berýär.
Uzak aralykdan okuw formatyna geçmek her binada bir wagtyň özünde okaýan talyplaryň sanyny azaldyp, 2 metr howpsuz aralygy üpjün etmäge mümkinçilik berdi. Bu başlangyç COVID-19 ýaly howply wiruslaryň ýaýramagynyň öňüni almak bilen baglanyşykly çäreleri ýerine ýetirmek maksady bilen öňe sürüldi.
Ýurdumyzyň welaýatlaryndan okuwa girip okaýan ýokary kurs talyplar hem öýlerinde oturan ýerinden onlaýn sapaklara gatnaşýarlar. Okuwçylaryň "gatnaşygy" mugallymlar tarapyndan dürli usullar bilen gözegçilikde saklanylýar. Bularyň hemmesi okuwlaryň sapak geçmek üçin saýlanyp alnan tehniki serişdelerine baglydyr.
Uzak aralykdan okuwyň dowamlylygy ähli ýokary okuw mekdepleri üçin umumy, ýagny kyrk minut bolmagynda galýar. Arakesmeler 10 minut dowam edýär. Iki sany çalşyk hereket edýär - irdenki we agşamky, bu talyplar toparyny iki ýa-da has köp topara bölmäge mümkinçilik berýär.
Talyplar bilen mugallymlaryň arasyndaky aragatnaşygyň esasy usuly, test çatynda toparlaýyn habarlaşmadyr. Her bir çat onlaýn-leksiýa wagtynda sorag berip bolýan wirtual synp otagydyr. Munda toparlaýyn wideo we ses jaňlary hem ulanylýar.
Okuw materiallary we ýumuşlar, esasan, e-poçta bilen iberilýär. Hem içerki, hem daşary ýurt programma üpjünçiliginden peýdalanylýar. Onlaýn sapaklary geçirmek üçin uniwersitetleriň mugallymlary elektron prezentasiýa taýýarlaýarlar, öňünden sanly edebiýaty saýlaýarlar.
Uzak aralykdan okuwlar düýbünden täze tejribe bolup, häzirki wagtda ol bilimiň hilini artdyrmakda öňdebaryjy usullaryň biri hasaplanylýar.
