“Sputnik V” sanjymyny döredijileri Nobel baýragyna hödürlemek teklip edildi

“Sputnik V” sanjymyny döredijileri Nobel baýragyna hödürlemek teklip edildi

Russiýanyň saglygy goraýyş boýunça Döwlet duma komiteti koronawirus ýokanjyna garşy “Sputnik V” atly dünýäde ilkinji sanjymy döreden N.F.Gamaleýa adyndaky milli barlag merkeziniň alymlaryny 2021-nji ýylda Nobel baýragyna hödürlemegi teklip etdi. Bu barada RIA Nowosti habar berýär.

“Koronawirusa garşy dünýäde ilkinji sanjymy döredijiler — Russiýanyň N.F.Gamaleýa adyndaky epidemiologiýa we mikrobiologiýa milli merkeziniň alymlary indiki ýyl Nobel baýragyna dalaşgär hödürlenilmeli” – diýip, RIA Nowosti komitetiň başlygynyň orunbasary Leonid Ogulyň sözlerini getirýär.

Onuň aýtmagyna görä, rus alymlarynyň pandemiýa bilen göreşe goşan goşandyny bahalandyrmak kyn we ol dünýä jemgyýetçiligi tarapyndan bellenilmelidir.

“Häzirki wagtda dünýäde tas 36 mln adamyň kesellemegine, bir milliondan gowrak adamyň ýogalmagyna sebäp bolan täze koronawirus ýokanjyna garşy sanjymyň oýlanyp tapylmagy ylym we lukmançylyk pudagynda hakyky üstünlikdir” – diýip, ol belledi.

Duma komitetiniň agzasy Boris Mendeleýewiç, öz gezeginde, Russiýada COVID-19-a garşy sanjymyň döredilmegini dünýäde öňegidişlik diýip atlandyrdy.

“Sanjymyň täsirliligi subut edilen ýagdaýynda, ol tutuş dünýä boýunça millionlarça adamyň saglygyny ýaramaz netijelerden gorap biler. Meniň pikirimçe, sanjymy döredijiler, iň bolmanda, Nobel baýragyna dalaşgär bolmalydyr” – diýip, ol belledi.