ABŞ-da COVID-19 koronawirusyna garşy sanjymyň ilat arasynda giňden ýaýradylmagy oktýabrda başlanar, 2020-nji ýylyň ahyryna çenli 100 million doza sanjym taýýar bolar diýip, ABŞ-nyň prezidenti Donald Tramp aýtdy. Bu barada interfax.ru habar berýär.
“Biz sanjymy örän ygtybarly hem täsirli ýagdaýda gowşurmaga we ýaýratmaga çalyşýarys. Biz muny oktýabrda başlap bileris diýip pikir edýäris” – diýip, Tramp Ak öýüň metbugat-maslahatynyň dowamynda aýtdy we munuň “oktýabryň ortalarynda, belki, ondan gijräk boljakdygyny” hem anyklaşdyrdy.
Soňra metbugat-maslahatynda prezident ýagdaýlaryň şowsuz ýaýbaňlananda ABŞ-da sanjyma biraz köpräk – “noýabrda ýa-da iň bolmanda, dekabrda” garaşmaly boljakdygyny hem sözüniň üstüne goşdy.
Ol sanjym Iýmit önümleriniň we derman serişdeleriniň hiline sanitar gözegçilik boýunça edara tarapyndan tassyklanandan soň, ABŞ-da sanjymyň millionlarça dozasynyň öndürilip başlanjakdygyny hem aýtdy. 2020-nji ýylyň ahyryna çenli, prezidentiň aýtmagyna görä, koronawirusa garşy azyndan 100 million doza sanjym ýurtda ulanylmaga taýýar bolar.
Tramp ABŞ-nyň edarasynyň sanjymyň tassyklanylan gününden ýa-da ertirki gün ýurduň dürli şäherlerine sanjymyň iberilmegine mümkinçilik berjek meýilnamany hem taýýarlandygyny ýatlap geçdi.
