Koronawirusa garşy Oksford sanjymy Russiýada synagdan geçiriler

Koronawirusa garşy Oksford sanjymy Russiýada synagdan geçiriler

Russiýanyň Saglygy goraýyş ministrligi AstraZeneca britan-şwed farmaseptik kompaniýasyna (Oksford uniwersitetiniň alymlary bilen bilelikde koronawirusa garşy sanjymy taýýarlaýar) serişdesiniň kliniki synaglarynyň üçünji, jemleýji tapgyryny Russiýada geçirmäge rugsat berdi. Bu barada Reýter agentligine salgylanyp, kommersant.ru ýetirýär.

«Kliniki barlaglaryň maksady — uly adamlarda COVID-19 täze koronawirus ýokanjynyň öňüni almak üçin AZD1222 serişdesiniň immun jogabyny döredijiligini we howpsuzlygyny bahalandyrmak» — diýlip, kliniki barlaglary geçirmäge rugsat hatynyň rus ýazgysynda aýdylýar.

Barlaglara 150 adam gatnaşar. Olary Moskwada we Sankt-Peterburgda dört sany lukmançylyk edarasy, şol sanda RF-iň Saglygy goraýyş ministrliginiň Smorodinsew adyndaky dümewiň ylmy-barlag instituty we Akademik Pawlow adyndaky Birinji Sankt-Peterburg döwlet lukmançylyk uniwersiteti geçirer.
Öň, «R-Farm» rus farmaseptik kompaniýasy AstraZeneca bilen COVID-19-a garşy Oksford sanjymynyň önümçiligi we üpjünçiligi barada gepleşdi. Häzir dünýäde bir sanjym — Gamaleýa adyndaky merkeziň taýýarlan «Sputnik V» sanjymy bellige alyndy. Ol 11-nji awgustda bellige alnypdy. Onuň kliniki synaglary heniz tamamlananok.

Şeýle hem okap bilersiňiz: