Russiýanyň koronawirusa garşy sanjymy «Sputnik V» adyny aldy

Russiýanyň koronawirusa garşy sanjymy «Sputnik V» adyny aldy

Russiýanyň koronawirusa garşy sanjymy 1957-nji ýylda uçurylan Ýeriň ilkinji emeli hemrasynyň hormatyna «Sputnik V» adyny aldy. Bu barada sanjymyň resmi saýtynda aýdylýar.

Saýtda sanjymyň adynyň ideýasy düşündirilýär. Onda «Sputnik-1» sowet hemrasynyň tutuş dünýäde kosmiki barlaglara gyzyklanma döredendigi bellenilýär. Rus sanjymy dünýä bileleşigi üçin «Hemranyň pursatyny» döretdi diýlip hasaplanylýar. Şu deňeşdirmäniň esasynda hem sanjym «Sputnik V» adyny aldy.
Mundan öň habar berşimiz ýaly, 11-nji awgustda RF-iň prezidenti Wladimir Putin hökümet maslahatynda Russiýada koronawirusa garşy dünýäde birinji sanjymyň bellige alnandygyny habar berdi. Wladimir Putin serişdäniň köpçülikleýin önümçiliginiň ýakyn wagtda başlajakdygyna umyt bildirdi we sanjym goýberme işleriniň meýletin esasda geçmelidigini belledi. Döwlet ýolbaşçysy özüniň bir gyzynyň koronawirusa garşy rus sanjymyny barlap görendigini hem gürrüň berdi.
Öň, RF-iň Saglygy goraýyş ministrliginiň ýolbaşçysy Mihail Muraşko Gamalei adyndaky epidemiologiýanyň we mikrobiologiýanyň barlag merkeziniň önümi bolan koronawirusa garşy sanjymyň ýokary täsirliligi we howpsuzlygy görkezendigini aýtdy. Serişdäni ilkinji bolup awgustyň ahyrynda lukmançylyk işgärleri we mugallymlar alar. Raýat dolanyşygynda sanjym 2021-nji ýylyň 1-nji ýanwarynda peýda bolar, bu serişdäniň synagynyň üçünji tapgyry bilen birwagtda bolup geçer.
Russiýada soňky günlerde ýurduň 85 sebitinde koronawirus bilen kesellemegiň 4945 sany täze ýagdaýy ýüze çykaryldy.