ABŞ-nyň hökümeti COVID-19-a garşy sanjymy taýýarlamaga $1,6 mlrd bölüp berdi

Novavax amerikan kompaniýasy koronawirus infeksiýasyna garşy sanjymy taýýarlamak üçin $1,6 mlrd aldy. Bu barada news.ru habar berýär. Serişdäni ABŞ-nyň hökümeti bölüp berdi. Bu serişdeler 30 müň meýletinçiniň gatnaşmagy bilen synaglaryň üçünji tapgyryny geçirmekden başlap, kliniki işleri tamamlamaklyga hem-de enjamyň köpçülikleýin önümçiligine sarp ediler. Novavax 2020-nji ýylyň ahyryna çenli 100 mln doza sanjymy ýola goýmaly bolar.
Bu pul “Operation Warp Speed” meýilnamasy boýunça hökümet tarapyndan COVID-19 bilen göreşe gönükdirilen iň iri pul bolup durýar. Ol sanjymy almak işini çaltlaşdyrmak we koronawirusyň öňüni almaga hem-de bejermäge ilatyň köpçülikleýin elýeterliligini üpjün etmek üçin Donald Trampyň edarasy tarapyndan döredilen. Bu dermany adamlarda synagdan geçirmegiň birinji tapgyry Melburnda maý aýynda başlady. Onuň deslapky netijeleri iýul aýynda neşir ediler diýlip, Novavax kompaniýasynyň resmi saýtynda aýdylýar.
Öň, koronawirusa garşy sanjymyň birinji synagy Günorta Afrika Respublikasynda başlady. Barlaga iki müň meýletinçi gatnaşýar. Sanjym britan Oksford uniwersitetiniň AstraZeneca farmasewtika korporasiýasy bilen hyzmatdaşlygynda taýýarlanyldy.
Ýatlap geçsek, geçen hepde BSGG-niň ýolbaşçysy häzir dünýäde koronawirusa garşy 141 sanjymyň taýýarlanylýandygyny aýtdy. Sanjymyň prototipi birnäçe aýdan peýda bolar, sebäbi käbir barlaglar “eýýäm üstünlige ýakyn”.