Hindistanda salony tebigy agaçdan we ýüňden bolan elektromobil döredildi

«Tata Motors» hindi kompaniýasy Nýu-Delidäki motorşouda Sierra adyny alan geljekki seriýaly krossoweriň prototipini hödürledi. Konsept güýçli elektrik gurluşa, oturylýan ýerleriň üýtgeşik konfigurasiýasyna we tebigy materiallardan, şol sanda agaçdan we hakyky ýüňden edilen interýer bezegine eýe boldy. Bu barada «Motor» habar berýär.
Tata Sierra EV-niň binýadynda Altroz hetçbegi üçin ulanylýan Tata ALFA modul platformasy durýar. Ýöne konsept bilen bagly ýagdaýda bu «arabanyň» elektromobiller üçin niýetlenilen aýratyn konfigurasiýasy peýdalanyldy. Şoukar diňe geljekki tapgyrlaýyn modeliň nyşany bolman, eýsem, ol Impact 2.0 markanyň täze dizaýner konsepsiýasyny görkezýär. Onuň häsiýetli aýratynlygy – birsydyrgyn çyzyklar, sada formalar we detallara üns berijilik.
1991-nji ýyldan 2000-nji ýyla çenli çykarylan original Sierradan alan ady bilen bir hatarda, şoukar oturylýan ýerleriň täsin konfigurasiýasyny hem özüne nusga edip aldy: yzky diwan ulagyň çep bortunda oturdylan. Elektromobiliň dört gapysy bar (ýük goýulýan ýerinden başlap), olaryň biri gapdal tarapa açylýar.
Salon «tebigata ýakynlyk» ýörelgä esaslanyp minimal stilde ýerine ýetirilen, bu bolsa tebigy materiallaryň köpçülikleýin ulanylyşyna şaýatlyk edýär. Döwrebap sistemalardan Sierra EV diňe sanly enjam paneline eýe boldy — Tatada muny awtomobiliň «sanly detoksa» ýa-da başgaça gajetlerden ýüz öwürmä çagyrýanlygy bilen düşündirdiler. Şonuň üçin onda multimediýa ulgamy hem ýok.
Deslapky maglumatlara görä, «harytlyk» Tata Sierra-sy 2023-nji ýyla çenli peýda bolar.