Argentinanyň Buenos-Aýres welaýatynyň Awelýaneda şäherinde Maý rewolýusiýasynyň gününe bagyşlanyp guralan sendwiç taýýarlamak çäresi garaşylmadyk bulama-bujarlyk bilen tamamlandy. Bu barada ýerli KHBS-e salgylanyp, «The Asia Business Daily» neşiri habar berýär.
«Parrilla El Tano» restorany tarapyndan guralan çärede uzynlygy 750 metr bolan dünýäde iň uzyn etli sendwiçi taýýarlamak we Ginnesiň rekordlar kitabyna girmek meýilleşdirilipdi. Bu ägirt uly tagamy taýýarlamak üçin guramaçylar 1500 kg sygyr etini, 7500 sany ýumurtga we 1000-den gowrak uzyn baget çöregini satyn aldy.
Ýöne tagamy taýýarlamak we ony kesip paýlamak işiniň aşa gijikdirilmegi mugt iýmite garaşyp duran müňlerçe sabyrsyz tomaşaçynyň närazylygyna getirdi. Ahyrynda mähelle gorag germewlerini ýykyp, stollara tarap ylgady we aşpezleriň gözüniň öňünde sendwiçi bölek-bölek edip alyp gitmäge başlady. Hatda käbir adamlar iýmitler bilen birlikde çäräni geçirmek üçin ulanylan predmetleri hem alyp gitdi.
KHBS-iň habar bermegine görä, sendwiçiň uzynlygyny notarius ölçäp ýetişdi we ol rekord 771 metre ýetdi. Muňa garamazdan, ýüze çykan tertipsizlikler sebäpli Ginnesiň rekordlar kitabynyň resmi barlag prosesi bes edildi we rekord hasaba alynmady.
