Şwesiýanyň AirForestry kompaniýasy agyr ýerüsti enjamlary ulanmazdan, agaçlary kesmäge we daşamaga ukyply, awtonom agaç kesiji drony işläp düzdi.
Enjam elektrik motory bilen işleýär.
Dron agaçlaryň çür depesinden uçup, agajy ýokarsyndan tutýar, aşak düşüp barýarka şahalaryny kesýär, soňra göwdesini düýbünden kesip, ony golaýdaky ýola çykarýar.
Kompaniýa adaty tokaý kesiji enjamlaryň agramynyň 20 tonnadan gowrakdygyny we tokaýyň düşegine zyýan ýetirýändigini belleýär. AirForestry dronlary ulanmagyň topraga we agaçlaryň kök ulgamyna ýetýän zeperi azaldar diýip hasaplaýar.
Dronuň 6,2 metr uzynlykdaky korpusy uglerod süýmünden ýasalypdyr. Ol 200 kilograma çenli ýüki daşap bilýär we aýazda, ýagyşly we güýçli ýelli howada işlemek üçin niýetlenendir.
Şeýle hem, kompaniýa täze tehnologiýa alynýan agajyň möçberini takmynan 8% artdyryp biler diýip mälim edýär.
AirForestry häzirki wagtda Tronheýmiň golaýynda Norwegiýanyň Statskog tokaý hojalygy agentligi bilen bilelikde synag işlerini geçirýär.
