SpaceX amerikan kompaniýasynyň geljekde Aýa we Marsa uçuşlar üçin niýetlenen, Super Heavy V3 göteriji raketasy bolan Starship super-agyr kosmos ulgamynyň synag uçuşyny üstünlikli amala aşyrdy. Uçuş 22-nji maýda ýerli wagt bilen sagat 17:30-da (Aşgabat wagty bilen 23-nji maýda sagat 03:30-da) Tehas ştatynyň Boka-Çika sebitindäki kosmodromdan amala aşyryldy.
Aslynda bu uçuş bir gije-gündiz öň meýilleşdirilipdi, ýöne ýüze çykan tehniki näsazlyk sebäpli yza süýşürildi.
Raketa asmana galandan ýedi minut soň, Super Heavy tizleşdirijisi kosmos gämisinden aýryldy we Meksika aýlagyna gondy. Starship gämisiniň özi bolsa Ýeriň daşyndan doly bolmadyk aýlawy amala aşyryp, orbita 20 sany emeli hemra-imitatoryny we döwrebaplaşdyrylan iki sany Starlink hemrasyny çykardy.
Gämi öz öňünde goýlan wezipäni ýerine ýetirenden soň, orbitadan çykdy we Hindi ummanynyň öňünden kesgitlenen sebitine gondy. Uçuşyň umumy dowamlylygy 65 minut boldy.
Bu uçuş Starship ulgamynyň 12-nji synag uçuşy bolup, döwrebaplaşdyrylan Raptor hereketlendirijileri bilen enjamlaşdyrylan V3 üçünji nesil raketasy üçin ilkinji synagdyr. Mundan öňki geçirilen 11 uçuşyň 6-sy üstünlikli diýlip ykrar edilipdi.
Köp gezeklik Starship V3 ulgamynyň beýikligi 124 metre barabar. SpaceX kompaniýasy ony adamzat taryhyndaky iň uly we iň kuwwatly raketa diýip atlandyrýar. Super Heavy tizleşdirijisiniň kuwwaty NASA tarapyndan Aýa adamly uçuşlar üçin ýörite işlenip taýýarlanylan Space Launch System raketasynyň kuwwatyndan, takmynan, iki esse ýokarydyr.
