Ispaniýaly hünärmen Alwaro Arbeloa geçirilen metbugat maslahatynda möwsüm tamamlanandan soň, Madridiň «Real» futbol klubunyň baş tälimçisi wezipesinden gidýändigini mälim etdi.
Arbeloa 12-nji ýanwarda Habi Alonsonyň deregine «Real Madrid» toparynyň baş tälimçisi wezipesine bellenipdi. Şenbe güni «Real Madrid» Ispaniýanyň çempionatynyň iň soňky — 38-nji tapgyrynyň çäginde «Atletik Bilbao» toparyny kabul eder. Klub tamamlanyp barýan möwsümde hiç hili kubok gazanyp bilmedi.
«Öňümizdäki duşuşyk meniň «Real Madridiň» tälimçisi hökmünde iň soňky oýnum bolar. Başdan geçiren ähli zatlarymyz üçin kluba örän minnetdar. Biziň aramyzda käbir düşünişmezlikler boldy, bu adaty zat. Biz olary iň gowy ýol bilen çözmegi başardyk. Biz biri-birimize hormat goýduk… Men soňky aýlarda özümden has köp «Real» barada pikirlendim we klub üçin iň bähbitli ädimi ätdim. Başga bir klubda hemme zat başgaça bolup bilerdi, ýöne bu ýerde meniň etmeli zadym şu boldy. Ökünmäge hiç hili sebäp ýok» – diýip, «Marca» neşiri Arbeloanyň sözlerini getirýär.
Arbeloa 43 ýaşynda. Ol «Real Madridiň» öz ýetişdiren oýunçysy bolup, topar bilen futbolçy hökmünde Ispaniýanyň çempionatyny (2012), Kubogyny (2011, 2014), Superkubogyny (2012), şeýle hem Çempionlar ligasyny (2014, 2016), Klublaýyn dünýä çempionatyny (2014) we UEFA-nyň Superkubogyny (2014) gazandy. Ol «Deportiwo», Angliýanyň «Liwerpul» we «West Hem» toparlarynda hem çykyş etdi. Ispaniýanyň milli ýygyndysynyň düzüminde bolsa dünýä çempiony we iki gezek Ýewropa çempiony boldy. Arbeloa şu wagta çenli uly ýaşly toparlara hiç wagt tälim bermändi. Ol 2020-nji ýyldan bäri «Realyň» akademiýasynda dürli ýaşdaky ýaşlar toparlaryny türgenleşdirip gelýärdi.
