Çehiýanyň Warhorse studiýasy «Ýüzükleriň hökümdary» älemine esaslanýan açyk dünýäli täze RPG oýnunyň, şeýle hem Kingdom Come seriýanyň nobatdaky böleginiň üstünde işlenilýändigini resmi taýdan tassyklady.
Oýun taýýarlaýjylar tarapyndan berlen maglumata görä, iki oýnuň hem üstünde işler eýýäm alnyp barylýar. Studiýa bu baradaky jikme-jiklikleri has soňra mälim etjekdigini belledi.
Mundan ozal Warhorse-yň wekilleri Indržihiň taryhynyň 2025-nji ýylda çykan «Kingdom Come» oýnunyň ikinji bölegi bilen tamamlanandygyny, bu tapgyryň geljekki täze taslamalarynyň bolsa başga gahrymanlara bagyşlanyp biljekdigini habar beripdiler. Ýöne taslamanyň dowamy barada häzirlikçe başga goşmaça maglumat ýok.
«Ýüzükleriň hökümdary» älemi boýunça täze RPG oýnunyň döredilýändigi baradaky gürrüňler soňky aýlarda internetde ýygy-ýygydan peýda bolupdy. Indi bolsa studiýa bu taslamanyň bardygyny resmi ýagdaýda tassyklady.
Şeýle hem, Warhorse studiýasynyň esaslandyryjysy we «Kingdom Come» oýnunyň awtory Daniel Wawra oýun taýýarlamak işlerinden biraz daşlaşyp, özüniň şu orta asyr taryhyny ekrana geçirmek işlerine ünsüni gönükdirendigi habar berilýär.
Çeşmeleriň berýän maglumatlaryna görä, «Ýüzükleriň hökümdary» älemi boýunça ýene bir oýny Tomb Raider tapgyry bilen meşhur bolan Crystal Dynamics studiýasy hem taýýarlaýan bolmagy mümkin.
