25-nji maýda Honor kompaniýasy Honor 600 hatarynyň hytaý wersiýasyny resmi taýdan hödürlär we ol, maglumatlara görä, smartfonyň global wersiýasyndan düýpli tapawutlanýar. Onuň esasy aýratynlyklarynyň biri bolsa smartfona magnit arkaly birikdirilýän hem-de ondan aýratynlykda hem işläp bilýän aýrylýan yzky ekran bolup biler.
Internet torunda bu ekranyň ilkinji suratlary peýda boldy. Fix Focus Digital insaýderiniň berýän maglumatlaryna görä, bu aksessuar magnitleriň kömegi bilen berkidilýär we bir wagtda birnäçe funksiýany ýerine ýetirýär. Ol kamerany dolandyryş pulty, surata düşürmek üçin goşmaça yşyklandyryş, fotosuratlary we beýleki maglumatlary görkezýän goşmaça displeý hökmünde işläp bilýär.
Daşky görnüşi boýunça bu aksessuar Honor logotipi we bezeg ýyldyzjyklary bolan tegelek korpus şekilinde bolup, ulaldylan Apple AirTag-y ýatladýar. Enjamyň USB-C porty we öçürip-ýakylýan düwmesi bolar, bu bolsa onuň smartfondan özbaşdak ýagdaýda işläp biljekdigini görkezýär.
Bu üýtgeşik «magnitli ekrandan» başga-da, smartfonyň Hytaý üçin niýetlenen görnüşinde has ulaldylan batareýalara garaşylýar: Honor 600 modelinde 8600 mA·s çenli we Honor 600 Pro modelinde bolsa 8000 mA·s töweregi bolar, bu bolsa global modelleriňkiden ep-esli köpdür.
Şol bir wagtda smartfonlaryň esasy gurluşy meňzeşligine galar: 120 Gs ýygylykly 6,57 dýuýmlyk AMOLED ekrany, kiçi modelde Snapdragon 7 Gen 4 çibi we Pro modelde bolsa Snapdragon 8 Gen 5 çibi ýerleşdiriler. Mundan başga-da, uly modelde 200 Mp esasy kamera we kämilleşdirilen teleobýektiw bolar.
