WhatsApp messenjerinde alnan hatlaryň okalanyndan soň awtomatiki ýagdaýda ýitip gitmegine mümkinçilik berýän täze funksiýa synag edilýär.
«WABetaInfo» neşiriniň habar bermegine görä, bu täze funksiýa «TestFlight» platformasyndaky goşundynyň iň soňky beta-wersiýasynda peýda boldy. Ulanyjylar ýitip gidýän hatlaryň taýmerini sazlan wagtlary «Okalandan soň» režimini saýlap bilerler.
Funksiýanyň düşündirişine görä, okalman galan hatlar 24 sagatdan soň awtomatiki ýagdaýda pozular. Hat okalanyndan soň bolsa, ulanyjy ýitip gitmek üçin goşmaça wagt aralygyny — 5 minut, 1 sagat ýa-da 12 sagat edip belläp biler.
Häzirki wagtda WhatsApp-da 24 sagat, 7 gün ýa-da 90 günden pozulýan wagtlaýyn hatlar eýýäm elýeterlidir. Täze režim häzirki bar bolan gizlinlik sazlamalaryny has-da giňeldýär.
«WABetaInfo-nyň» maglumatlaryna görä, funksiýa häzirlikçe beta-synagçylaryň bir bölegine elýeterlidir. Käbir ulanyjylar synaga «App Store» arkaly goşundynyň wersiýasy bilen hem girip bildiler.
WhatsApp-da ýitip gidýän hatlary hem aýratyn çatlar üçin, hem-de ähli täze gepleşikler üçin öňünden bellenen tertipde işjeňleşdirip boljakdygy düşündirildi. Bu funksiýanyň gizlinligi ýokarlandyrmaga we enjamda eýeleýän ýadyň göwrümini azaltmaga kömek etmegine garaşylýar.
