«Trump Mobile» kompaniýasy ozal çykyş möhletiniň gijikdirilmegi we dizaýnynyň üýtgedilmegi sebäpli birnäçe gezek tankyt edilen «T1 Phone» smartfonynyň ilkinji nusgalaryny žurnalistlere gowşuryp başlady.
Smartfony ilkinji bolup alanlaryň hatarynda smartfonyň gysgaça wideosynyny çap eden NBC News-iň žurnalistleri bar. Enjamyň jemleýji wersiýasy iPhone we Samsung-yň flagman modellerini ýadyňa salýan ilkinji konsepsiýalardan düýpli tapawutlanýar.
Android Authority neşiriniň maglumatlaryna görä, enjam häzirki wagtda 2024-nji ýylyň «HTC U24 Pro» smartfonyna has meňzeş, diňe ujypsyz üýtgeşmeler bar. Smartfon yzky panelinde Amerikanyň baýdagynyň şekili bolan altyn reňkli korpusda ýerine ýetirilipdir. Baýdakda adaty 13 zolaga derek 11 zolagyň çekilendigi žurnalistleriň ünsünden düşmändir.
Şeýle hem gaplamadaky bellik üýtgedildi. «Made in USA» (ABŞ-da ýasalan) ýazgysynyň ýerine indi «Proudly Assembled in USA» — «ABŞ-da buýsanç bilen ýygnalan» diýen takyklama ulanylýar.
Tassyklanan aýratynlyklaryň arasynda 512 GB göwrümli ýat, Android operasion ulgamy we simli nauşnikler üçin 3,5 mm konnektor bar. Smartfona «Truth Social» sosial torunyň goşundysy öňünden gurnalypdyr.
Enjamyň bahasy 499 dollar bolar. Ozal «Trump Mobile» 100 dollar möçberinde depozit bilen öňünden sargytlary kabul edipdi.
«NBC News» «Trump Mobile-a» baýdagyň dizaýny we detallaryň gelip çykyşy barada düşündiriş bermegini soraýan hat iberdi, ýöne oňa jogap almady. Ak tam hem ABŞ-nyň Prezidenti Donald Trampyň bu smartfony hut özüniň ulanýandygyny ýa-da ýokdugyny anyklaşdyrmady.
